‘n 44-jarige boekhouer van Gqeberha is deur die Valke in hegtenis geneem nadat sy na bewering haar voormalige werkgewer met meer as R3 miljoen bedrieg het deur ‘n uitgebreide betalingsmanipulasieskema wat oor twee jaar gestrek het.
Volgens Valke-woordvoerder adjudant-offisier Ndiphiwe Mhlakuvana is Kirsten Diener op 24 Julie deur die Valke se Eenheid vir Ernstige Kommersiële Misdaadondersoeke in hegtenis geneem. Sy het dieselfde dag in die Gqeberha Nuwe Regshof op aanklagte van bedrog en geldwassery verskyn.
Hy het gesê die inhegtenisneming volg op ‘n noukeurige, intelligensiegedrewe ondersoek na bewerings van finansiële wanpraktyke wat deur City Paint and Tool, ‘n gevestigde onderneming in Newton Park, Gqeberha, aangemeld is.
“Daar word beweer dat die verdagte tussen Mei 2024 en Mei 2026, terwyl sy as boekhouer werksaam was, haar vertrouensposisie en fidusiêre verantwoordelikheid misbruik het deur die maatskappy se betalingsprosesse vir persoonlike gewin te manipuleer,” het Mhlakuvana gesê.
Hy het verder gesê sy het na bewering wettige betalings aan verskaffers op die maatskappy se rekeningkundige stelsel vasgelê met egte stawende dokumentasie en goedgekeurde verskafferbesonderhede.
Voordat die betalings egter verwerk is, het sy glo die bankbesonderhede van die begunstigdes verander en die wettige verskaffers se rekeninge vervang met bankrekeninge onder haar beheer by twee verskillende banke.
Mhlakuvana het gesê waarskuwingstekens is geïdentifiseer, waarna die saak vir ‘n deeglike ondersoek na die Valke verwys is.
“Die ondersoek het die beweerde wanvoorstelling bevestig wat daartoe gelei het dat die maatskappy ‘n finansiële verlies van meer as R3 miljoen gely het. Die geld is onregmatig na rekeninge oorgeplaas wat na bewering met die verdagte verbind word,” het hy gesê.
Volgens Mhlakuvana het die Valke ná ‘n uitgebreide ondersoek ‘n sterk saak opgebou wat tot Diener se inhegtenisneming gelei het.
Sy het in die Gqeberha Nuwe Regshof verskyn, waar sy in aanhouding gebly het.
Die saak is tot 27 Julie uitgestel vir ‘n formele borgtogaansoek.