’n Gewone noodreaksie het Woensdagoggend, 15 Julie, in ’n tragedie geëindig toe ’n paramedikus van Bester Emergency Medical Services (EMS) in ’n kop-aan-kopbotsing by die kruising van die William Moffett-snelweg en Kaapseweg in Newton Park, Gqeberha, dood is.
Volgens die woordvoerder van die departement van vervoer, Makhaya Komisa, het die paramedikus omstreeks 09:30 op ’n mediese noodgeval gereageer toe die ambulans met ’n Toyota Hilux, wat uit die teenoorgestelde rigting gekom het, gebots het.
SAPD-woordvoerder, kapt. Sandra Janse van Rensburg, het gesê voorlopige inligting dui daarop dat die verkeerslig groen was vir die bestuurder van die Toyota Hilux ten tyde van die botsing.
“Die impak het veroorsaak dat albei voertuie omgeslaan het,” het sy gesê. “ ’n 25-jarige manlike passasier in die ambulans het noodlottige beserings opgedoen en is op die toneel dood verklaar. Die ambulansbestuurder en die bestuurder van die Toyota Hilux is beseer en na ’n hospitaal geneem vir mediese behandeling.”
Janse van Rensburg het bygevoeg dat die identiteit van die oorledene bekend gemaak sal word sodra sy naasbestaandes hom formeel geïdentifiseer het.
“Die ondersoek duur voort, en SAPD-speurders van Mount Road het ’n saak van strafbare manslag geopen,” het sy gesê.