Voormalige All Black-flank Josh Kronfeld sê Tony Brown het ’n heel nuwe dimensie aan die Springbokke se speelstyl toegevoeg sedert hy by Suid-Afrika se afrigtingspan aangesluit het.
Brown het hom in 2024 by Suid-Afrika aangesluit en verskeie aanvallende elemente tot die Springbokke se spel gevoeg. Dit, tesame met hul oorheersing met die voorspelers en hul lugspel, maak van die Bokke ’n besonder moeilike span om teen te speel.
“Daar is ’n goeie rede waarom hulle wêreldkampioene en nommer een in die wêreld is. Rassie Erasmus is ’n uitstekende afrigter, maar Tony Brown van die Highlanders het ’n heel nuwe dimensie bygevoeg. Toe ek hoor hulle het Tony gekontrakteer, het ek net gedink: ‘Ons is in groot moeilikheid,’” het Kronfeld in ’n onderhoud met Betway gesê.
Tony bring ritme na die spel
“Hy was ’n afrigter toe hy nog in Nieu-Seeland was en kon nog altyd ’n span wat waarskynlik nie oor dieselfde fisieke krag as sy teenstanders beskik het nie, op ’n manier laat speel om hulle uit hul ritme te bring. Dit dwing hulle om dinge te doen wat hulle normaalweg nie sou doen nie.
“Hy is eenvoudig baie skerpsinnig wanneer dit by die spel, of die kuns van rugby speel, kom. Hy het ook daardie stil kalmte en gesag rondom hom. Die Springbokke se verkryging van Tony was ’n geweldige aanwins vir hulle.”
“Die Bokke is op die regte pad, maar jy gaan spelers nodig hê wat iets ’n bietjie anders kan bied, veral wanneer jy in die kwarteind- en halfeindronde teen jou tipiese spanne wat moeilik is om te klop, te staan kom.
Verskeidenheid
“Die Bokke is nommer een in die wêreld, maar die verskil tussen nommer een en vyf is deesdae nie groot nie. Die top vier kan maklik gedurende ’n seisoen van plekke verwissel en niemand sal ’n oog knip nie.
“Wat ek geniet, is dat daar tans ’n mate van verskeidenheid tussen al die spanne is. Ons het gesien hoe die Franse hierheen gekom het – dit was net hul B-span – maar hulle was uitstekend. Só behoort rugby gespeel te word.”
Kronfeld sê ’n toer na Suid-Afrika is iets baie besonders en dat dit ’n uitstekende ervaring sal wees vir die Nieu-Seelandse spelers wat nog nooit voorheen hier was nie.
“Jy kan dit nooit verstaan voordat jy self hierheen kom en Suid-Afrika ervaar nie. Daar is ’n hele paar van die ouens op hierdie toer wat nog nooit in Suid-Afrika was nie,” het Kronfeld opgemerk.
Suid-Afrikaanse trots
“Eerstens sal hulle nie weet wat om te verwag wanneer hulle in Suid-Afrika speel nie; tweedens speel hulle teen Suid-Afrikaanse trots; en derdens teen die hele Suid-Afrikaanse volk en ’n land. Dit is nogal ’n unieke ervaring. Dit is ’n unieke omgewing om in te wees.”
Kronfeld sê ’n oorwinning in die Greatest Rivalry-reeks sal Nieu-Seeland perfek voorberei vir die 2027-rugbywêreldbeker in Australië. ’n Nederlaag sal egter die teenoorgestelde uitwerking hê. Hy verwag nietemin dat die reeks uiters mededingend sal wees.
‘Tot op die nippertjie’
“As ons die reeks sou wen, sal dit enorme implikasies hê wanneer ons Australië toe gaan, die sloot oorsteek en daar die werk doen. Daar sal soveel selfvertroue wees.
“Maar as die teenoorgestelde gebeur, hemel behoede ons, ja, dan sal dit ’n impak hê. Dit sal beteken ons sal moet opdaag en probeer om iets nuuts te vind.
“My gevoel is dat dit nie so sal wees nie. Dit gaan ’n harde stryd wees en alles sal tot op die nippertjie uitgeveg word. Van al die lande waar ek al was, is dit verreweg die moeilikste.”