Springbok-afrigter Rassie Erasmus en sy span het Saterdag ’n belangrike twee dae van oefeninge afgesluit, met die doel om die hele groep op dieselfde bladsy te kry met die Rugby’s Greatest Rivalry-reeks (RGR) in hul visier.
Die reeks teen die All Blacks begin Saterdag 22 Augustus in Johannesburg ná afloop die toets teen Argentinië in Buenos Aires op 8 Augustus.
Die groep wat na Argentinië gereis het, bestaande uit 26 spelers en ’n groot aantal afrigters, het Maandagaand en Dinsdagaand in twee groepe na Suid-Afrika teruggekeer. Hulle het die grootste deel van die week aan herstel- en gimnasiumsessies bestee om die spelers ná die fisieke toets teen Los Pumas, wat die Bokke 17-10 gewen het, weer in Suid-Afrikaanse tyd te kry en wedstrydgereed te maak.
Die groep het Vrydag na die oefenveld teruggekeer en Saterdag nog ’n veldsessie gehad voordat hulle die volgende dag en ’n half vry gekry het om tyd saam met hul gesinne deur te bring. Daarna sal hulle voluit fokus op die toetsweek vir die openingswedstryd van die RGR-reeks.
Die toetse
Die spanne sal vier opeenvolgende toetse teen Nieu-Seeland speel.
- 22 Augustus: Ellis Park, Johannesburg
- 29 Augustus: DHL-stadion, Kaapstad
- 5 September: FNB-stadion, Johannesburg
- 12 September: M&T Bank-stadion, Baltimore in die VSA (Maryland)
Hersteltyd
Die Bok-haker Johan Grobbelaar en veelsydige voorspeler Elrigh Louw, wat toestemming gekry het om Saterdagaand vir die Bulle in hul RGR-wedstryd teen die All Blacks te speel, sal Sondag weer by die nasionale groep aansluit.
“Dit was belangrik om die spelers wat na Argentinië gereis het, goed te bestuur en hulle genoeg tyd te gee om van die wedstryd te herstel en weer by die plaaslike tydsone aan te pas. Daarom het ons eers laat in die week as ’n volledige groep begin oefen,” het Erasmus gesê.
“Maar ons is tevrede dat die spelers goed herstel het en gereed is om alles te gee vir die komende toetse teen die All Blacks.
“Dit gaan ongetwyfeld ’n baie uitdagende reeks wees, maar ons sien as ’n eenheid uit daarna. Hierdie reeks is amper soos om die uitklopfase van ’n Wêreldbeker te speel, want ons pak week ná week een van die wêreld se beste spanne, en ons verstaan almal die omvang van die RGR-reeks.
“Dit is ’n nuwe en opwindende uitdaging, en ons het agter die skerms baie werk gedoen, veral die groep afrigters en spelers wat die afgelope twee weke in Suid-Afrika agtergebly het. Ons sal volgende week die areas van ons spel waaraan ons wil verbeter, verder verfyn terwyl ons gereed maak om die veld te betree.”
- Die openingswedstryd skop volgende Saterdag 22 Augustus om 17:10 af en sal regstreeks uitgesaai word. Kaartjies kan by Springboks bespreek word.