Die Springbokspan word gewoonlik op ’n Dinsdag aangekondig. Dis die manier waarop Rassie Erasmus dinge doen.
Die laaste paar wedstryde het hy die Bok-span al die Maandag bekendgemaak . . . ’n verandering wat aanhangers selfs ’n dag vroeër kon opgewonde maak vir die naweek se wedstryd.
Maar vir die eerste toets van die Greatest Rivalry-reeks waarin Suid-Afrika teen die All Blacks te staan kom, gaan Erasmus van sy gewone skedule afwyk.
In plaas daarvan om die span Dinsdag aan te kondig, sal die Springbokspan vir Saterdag se wedstryd teen die All Blacks op Ellispark eers Donderdag om 14:00 bekend gemaak word.
Dit gee Erasmus meer tyd om sy spelers te evalueer, terwyl daar ’n paar belangrike keuringsbesluite geneem moet word.
Erasmus, met behulp van Joe Lewis en Felix Jones, sal beslis nog tyd geniet om die All Blacks se patrone te fynkam.
Dan is daar natuurlik ander vrae: Sal Siya Kolisi fiks wees nadat hy ’n dyspierbesering opgedoen het? Indien nie, wie sal Suid-Afrika aanvoer? Wie begin op losskakel, en wie sal van die bank af dekking bied?
Dit is slegs enkele van die vrae wat Donderdag beantwoord sal word.