Die Amerikaanse president, Donald Trump, het Dinsdag gesê geen gesprekke met Iran is tans aan die gang of geskeduleer nie, terwyl hy terselfdertyd ’n kaart gedeel het waarop die Straat van Hormoes as nuwe Amerikaanse grondgebied aangedui word, in ’n vars stekie na Teheran.
Trump hou vol met sy dreigement om soewereiniteit oor die belangrike energieroete op te eis, terwyl die oorlog met Iran, wat byna ses maande duur, voortgaan sonder veel teken van ’n oplossing.
Trump se gesant en skoonseun, Jared Kushner, het Maandag gesê die Verenigde State en Iran voer “baie positiewe en aktiewe gesprekke”, maar die president het ontken dat dit die geval is.
Geen gesprekke geskeduleer nie
“Daar is geen gesprekke of samesprekings aan die gang, of geskeduleer, met die Islamitiese Republiek van Iran nie. Die vlootblokkade bly ten volle van krag,” het Trump Dinsdag op sy Truth Social-platform geskryf.
“Die Straat van Hormoes is oop en funksioneer. Alle seemyne is verwyder of is het ontplof.”
Amerikaanse bronne het aan AFP gesê daar was “positiewe” gesprekke met die Iraniërs, maar het bygevoeg dat Trump besluit het om te wag en sy span versoek het om nie verder betrokke te raak totdat Iran gereed is om ’n ooreenkoms aan te gaan nie.
Vroeër Dinsdag het Trump ’n kaart op Truth Social geplaas waarop die Straat van Hormuz as “NUWE Amerikaanse grondgebied” aangedui word.
Iran het die strategiese seestraat, waardeur sowat ’n vyfde van die wêreld se olievoorraad vervoer word, in werklikheid afgesluit as vergelding vir die oorlog wat Trump saam met Israel einde Februarie begin het.