Springbok-hulpafrigter Mzwandile Stick het sy opgewondenheid uitgespreek om deel te wees van wat hy as ’n “spesiale toernooi” beskryf het teen die All Blacks in die Greatest Rivalry-reeks.
Stick het die media te woord gestaan nadat die Bokke hul voorbereiding op die veld vir Saterdag se eerste toets tussen die twee rugbyreuse op Ellispark afgehandel het en gesê het dat vier wedstryde in een seisoen teen die All Blacks altyd ’n groot uitdaging sou wees.
“Dit is die oomblikke waarvoor ons leef. Die naaste aan die Greatest Rivalry-reeks, waar elke wedstryd tel, is waarskynlik die Britse en Ierse Leeus-reeks of die uitkloprondes van die Wêreldbeker, en ons ingesteldheid vir hierdie wedstryde sal op daardie ervarings steun,” het Stick gesê.
Hy het bygevoeg dat dit ’n voorreg is om Suid-Afrika te verteenwoordig en dat die span nie die uitdaging ligtelik opneem nie.
“Ons weet dit gaan ’n taai uitdaging wees. Die All Blacks is in ’n goeie plek en speel baie goeie rugby. Maar van ons kant af wil ons ook aanhou verbeter en ontwikkel, en ons sal nooit gemaklik raak nie. Dit word nie moeiliker as om vier weke agtereenvolgens teen die All Blacks te speel nie, en ons sien baie daarna uit,” het hy gesê.
- Afskoptyd vir die eerste Bok-toets teen die All Blacks van die Greatest Rivalry-reeks is om 17:10 Saterdagmiddag.