Die departement van korrektiewe dienste (DKD) het ’n grootskaalse soektog van stapel gestuur na ’n gevangene wat op Sondag, 6 September, uit die Rooigrond-gevangenis naby Mahikeng in Noordwes ontsnap het.
Volgens die departement is die gevangene, Edward Khomotso Madiba, in die enkel selle aangehou op ’n verdere aanklag wat verband hou met ’n vorige ontsnapping toe hy daarin geslaag het om uit die fasiliteit te ontsnap.
Madiba dien tans ’n 20-jaar gevangenisstraf uit vir roof met verswarende omstandighede, die onwettige besit van ’n vuurwapen en ammunisie, ontvoering, en die oortreding van paroolvoorwaardes.
Hoe die ontsnapping plaasgevind het
Voorlopige inligting dui daarop dat Madiba volgens die DKD deur die diefweringdeur van die enkelselle gesny het om te ontsnap.
Die departement het sy veiligheidsdienste geaktiveer en werk saam met ander wetstoepassingsagentskappe om die voortvlugtige so gou moontlik op te spoor en weer in hegtenis te neem.
“Alle nodige maatreëls word ingestel om te verseker dat die oortreder Madiba opgespoor en terug in aanhouding geplaas word,” het die DKD gesê.
Agt amptenare staar moontlike skorsing in die gesig
Agt amptenare is kennis gegee dat hul skorsing oorweeg word hangende die uitslag van die ondersoek na die omstandighede rondom die ontsnapping.
’n Volskaalse ondersoek is ook van stapel gestuur na die voorval, insluitend die veiligheidsmaatreëls by die korreksiesentrum.
“Die doel is om vas te stel hoe die ontsnapping plaasgevind het en of enige nalatigheid of sekuriteitsoortreding tot die voorval bygedra het,” het die departement gesê.
DKD skors nog vier senior amptenare
Dr. Pieter Groenewald, die minister van korrektiewe dienste, het bekendgemaak dat vier senior amptenare van die departement – insluitend die hoof finansiële beampte – geskors is hangende ’n ondersoek na beweerde bedrog by ’n tender vir die verskaffing van steenkool aan die departement.
Volgens ’n persverklaring wat deur die departement uitgestuur is, is ’n strafregtelike klag by die Valke aanhangig gemaak.
“ ’n Forensiese ondersoek sal ook gedoen word om alle ongerymdhede vas te stel sodat moontlike ander betrokkenes vervolg kan word,” sê die verklaring.
“Met sy aanstelling as minister van korrektiewe dienste het dr. Groenewald verklaar dat die uitroei van korrupsie en bedrog, en gevolge vir amptenare wat oortree sy grootste prioriteit is.
“Die minister verwelkom hierdie deurbraak en sal verseker dat sy departement sy volle samewerking aan wetstoepassers gee om die skuldiges aan die pen te laat ry.”