Springbok-afrigter Rassie Erasmus het die span se doelwitte herhaal nadat hulle Nieu-Seeland met 43-28 verslaan het om die eerste Greatest Rivalry-reeks in Baltimore te wen.
Die Bokke het ses drieë teenoor die All Blacks se vier aangeteken om die reeks met 3-1 te beklink voor ’n Amerikaanse rugbyrekordskare van meer as 68 000 toeskouers, waarvan die meerderheid glo Suid-Afrikaners in die buiteland was.
“Dit was ongelooflik om soveel Suid-Afrikaners hier te sien. Ek weet nie hoe hulle dit bekostig het of hoe hulle hier gekom het nie, maar dit is wonderlik,” het Erasmus gesê.
“Ons waardeer die mense wat hier was, maar ons vergeet nie die mense wat tuis was nie; die mense op die plaas, die seun in die township of die mense in die winkelsentrum. Dít is wat ons dryf.
“Natuurlik wil ons wen en dit is wonderlik vir ons as span, en dit is hoekom ons rugby speel, maar ons wil hê hulle moet gelukkig wees.”
Die oorwinning het die agtereenvolgende wêreldkampioene se nommer een-posisie op die wêreldranglys bevestig, iets wat Erasmus erken het nie altyd maklik deur ander aanvaar word nie.
“Ek weet ons irriteer soms ander mense regoor die wêreld met die manier waarop ons dinge doen of die benadering wat ons tot sekere kwessies volg, maar ons gee die meeste om vir die mense van Suid-Afrika,” het hy gesê.
“Ons geniet die ander mense regoor die wêreld, en ons verstaan hul menings en hou van die skerts en gekibbel, maar daar is net een rede vir ons as span en vir ons as land, en dit is Suid-Afrika.”
Springbok-kaptein Siya Kolisi het ook die Bokke se wêreldwye ondersteuningsbasis geloof.
“Die ondersteuning is ongelooflik besonders vir ons. Dit is vir hulle wat ons dit doen; die mense wat dit kan bekostig om hierheen te kom en dié wat tuis is.
“Omdat daar ’n lang onderbreking was weens probleme met die skeidsregter se klanktoerusting, was ons steeds gefokus, maar op daardie oomblik kon ’n mens die skare regtig waardeer wat gesing en die atmosfeer geniet het, en hopelik het ons dit vir hulle spesiaal gemaak.”
Die wedstryd was tot in die laaste kwart nog in die weegskaal, en hoewel die Springbokke drie opeenvolgende wedstryde gewen het om die titel te verower, het Erasmus gesê die verskil tussen die twee spanne is minimaal.
“Ek sou nie sê ons was vandag die beter span nie,” het Erasmus gesê.
“Met 60 minute op die klok was die wedstryd steeds oop. Ons waardeer dat ons gewen het, maar die verskil tussen ons en Nieu-Seeland is baie klein.”
Die spanne het ná die eindfluitjie saam gebid.
Kolisi het gesê: “Ons het bymekaargekom om mekaar te bedank. Ons pak mekaar hard aan op die veld, maar ons kom goed oor die weg van die veld af.
“Die manier waarop die Nieu-Seelanders na ons land gekom het en ons land omhels het, en hoe hulle hulself aan die mense van ons land gegee het; daarom het ons saamgekom om hulle daarvoor te bedank. Dit is jammer dat een span moet wen en een moet verloor, maar ons weet ons gaan mekaar weer ontmoet.”
Die Springbokke se volgende uitdaging is ’n toetswedstryd teen Australië op 26 September.