Die vyfde liggaam van ’n vrou is Maandagoggend in Olifantsfontein, naby Kempton Park, ontdek, net twee dae nadat die polisie ’n multidissiplinêre ondersoek van stapel gestuur het na die dood van vier vroue wat tussen Julie en September in die gebied gevind is.
Die jongste ontdekking kom terwyl die familie van die vermiste drawwer, Elizabeth Mokolo Moselakgomo (38), die lykhuis in Germiston besoek het om die vierde liggaam, wat Saterdag gevind is, uit te ken.
Moselakgomo, wat deur haar geliefdes as “Tsontso” geken is, het op 9 September verdwyn nadat sy haar huis in Rhodesfield verlaat het vir ’n middag-draf tussen 17:30 en 18:30. Haar agtjarige dogter, wat sy alleen tuis gelaat het, het bekommerd geraak toe haar ma nie daardie aand terugkeer nie.
’n Verbyganger op pad werk toe het Maandagoggend die onbekende vrou langs die pad in Olifantsfontein aangetref en die polisie ontbied. Polisiewoordvoerder brigadier Athlenda Mathe het gesê die polisie vermoed die vrou is tussen Sondagaand en Maandagoggend daar agtergelaat.
Die grusame ontdekking versterk die toenemende kommer in die Kempton Park-gemeenskap nadat die waarnemende Gautengse polisiekommissaris, genl.maj. Fred Kekana, die media Sondag, 13 September, toegespreek het oor die vier vorige liggame wat onder soortgelyke omstandighede naby die R21 en in Rhodesfield gevind is.
Vier vorige liggame ontdek
Die eerste slagoffer, ’n vrou (37), is op 15 Julie naby die R21 gevind. Sy was kaal en haar hande was vasgemaak. ’n Verdagte is twee dae later, op 17 Julie, in hegtenis geneem en bly in aanhouding terwyl die ondersoek voortduur.
’n Tweede vrou (32) is op 24 Augustus gedeeltelik geklee naby die R21 aangetref. Die derde slagoffer, wie se identiteit steeds onbekend is, is op 10 September in ’n gevorderde stadium van ontbinding ontdek.
Die vierde liggaam, ook dié van ’n vrou (38), is Saterdag 12 September agter ’n hotel in Rhodesfield gevind. Sy het sportklere aangehad en was gedeeltelik geklee.