Springbok-agtsteman Jasper Wiese hoop die Bokke kan Saterdag ’n sterk vertoning vir die Amerikaanse publiek lewer wanneer hulle die All Blacks in Baltimore aandurf, sodat ondersteuners kan sien wat rugby behels in die VSA, die gasheer van die Rugbywêreldbeker in 2031.
Daar is egter veel meer op die spel. Die Bokke sal ook graag die Greatest Rivalry-reeks teen die All Blacks oortuigend wil beklink.
Die eindstryd van die reeks vind Saterdag by die M&T Bank-stadion in Baltimore plaas, en Wiese sê ’n oorwinning vir die Bokke sal ’n besondere prestasie vir die span wees.
“Ons is eers sedert Sondagmiddag hier, so ons het nog nie baie tyd buite die hotel deurgebring nie, maar dit is beslis ’n ongelooflike ervaring,” het Wiese gesê.
“Dit is my eerste keer hier. Party mense het ’n paar van die ouens herken, maar nie juis vir my nie. Hopelik kan ons egter hierdie naweek vir die mense hier ’n goeie vertoning bied en hulle ’n voorsmakie gee van waaroor rugby gaan.
“Die sport is natuurlik nie so groot hier soos in Nieu-Seeland of Suid-Afrika nie, maar die ondersteuners wat hierdie naweek daar gaan wees, gaan uitstekende rugby sien van twee spanne wat net hul beste wil gee.”
Met baie spelers in die Bokgroep wat reeds die Rugbywêreldbeker en ’n reeks teen die Britse en Ierse Leeus gewen het, sê Wiese dat die wen van die Greatest Rivalry-trofee nog ’n gedenkwaardige hoogtepunt vir die span sal wees.
Die Springbokke lei tans die reeks met 2-1, wat beteken dat ’n oorwinning of gelykopuitslag hierdie naweek die titel sal verseker. Indien die All Blacks egter wen, sal die trofee gedeel word.
“Vir hierdie groep sal dit iets ongeloofliks wees om te bereik. Ons benader hierdie reeks net so ernstig soos al die ander,” het Wiese gesê.
“Die laaste keer wat hulle in Suid-Afrika getoer het, was in 1996, en die All Blacks het daardie reeks gewen. Daarom sal dit iets besonders wees as hierdie groep die reeks kan wen.”
Wiese is ook nie bekommerd oor die afwesigheid van die beseerde All Blacks-kaptein Ardie Savea nie. Volgens hom beskik die ander spelers ook oor uitstekende vermoëns en sal hulle ewe vasberade wees om Saterdag se wedstryd te wen.
“Ardie is natuurlik ’n sleutelspeler vir hulle en was aan die begin van die reeks hul kaptein, maar ek dink nie sy afwesigheid verander ons voorbereiding nie,” het hy gesê.
“Hul ander losvoorspelers het baie ervaring en het ook al in groot wedstryde gespeel, so ons sal ons teenstanders met die grootste respek hanteer. In groot wedstryde staan daardie ouens altyd op.”
Op ’n vraag oor sy gevoelens nadat hy saam met Pieter-Steph du Toit en Bok-kaptein Siya Kolisi ’n nuwe rekord vir die meeste wedstryde in die beginspan as losvoorspelers opgestel het, het die fisieke agtsteman, wat Saterdag sy 49ste toetswedstryd speel, gesê dit voel onwerklik.
“Dit is ’n enorme voorreg om saam met sulke spelers te speel, en ek neem dit nooit as vanselfsprekend nie,” het hy gesê.
“Ek het eers ná die wedstryd van die rekord gehoor toe ons dit gesien het, maar ja, dit is baie spesiaal. Ons is goeie vriende, en dit maak dit soveel meer besonders om iets soos dit saam te bereik. Ek voel werklik bevoorreg.”
- Saterdag se wedstryd skop om 23:00 (SA tyd) af.