Hier is ons punte vir die Springbokke se spelpeil in Baltimore, Amerika.
Ox Nché (7)
Soos Louw het Nché nie die gewenste oorheersing in die skrums gekry nie, maar hy het wel ’n strafskop in een vaste faset afgedwing.
Malcolm Marx (7,5)
Nog ’n uitstekende vertoning van die Bok-haker, hoewel nie heeltemal so sterk soos die vorige week nie.
Wilco Louw (6,5)
Die Bokke het nie die oorheersing in die skrums gekry waarna hulle gesoek het nie, maar Louw het weer gewys waarom hy moontlik die sterkste loskopstut ter wêreld is.
Eben Etzebeth (8)
Dit was ’n uitstekende reeks vir Etzebeth, wat die rugbywêreld weer herinner het aan sy waarde. Hy was sterk met die bal in die hand, het Nieu-Seeland se lynstaanbal ontwrig en sy deel van die verdedigingswerk gedoen.
Ruan Nortjé (7,5)
Nortjé was een van die Bokke se onbesonge helde deur die reeks. Hy was sterk in die lynstane, werk onverpoos by afbreekpunte en maak sy duikslae. Hy het die nommer 5-trui behoorlik sy eie gemaak.
Siya Kolisi (7,5)
’n Groot verdedigende bydrae van Kolisi tydens sy tyd op die veld. ’n Uitmuntende leier.
Pieter-Steph du Toit (7,5)
’n Enjin wat eenvoudig nie ophou loop nie. Du Toit ontduik nooit sy verantwoordelikhede nie, hetsy op aanval of verdediging. Hy het ook sy naam op die telbord gekry.
Jasper Wiese (8,5)
Stormram, kragman, masjien. Dit beskryf alles wat Wiese vir die Bokke bied. Hy het verskeie sterk lopies gemaak, by die afbreekpunte lastig verkeer en alles geduik wat in ’n swart trui beweeg het.
Morné van den Berg (9,5)
Van den Berg het die geleentheid aangegryp om die nommer 9-trui sy eie te maak. Sy verdediging is uitstekend en hy lees die spel baie goed. Hy is as die amptelike speler van die wedstryd aangewys.
Sacha Feinberg-Mngomezulu (6)
Hy word met elke wedstryd beter terwyl hy sy selfvertroue ná sy ernstige enkelbesering herwin. Maar maak steeds talle foute op die aanval en verdediging.
Ethan Hooker (7,5)
As die bal hoog in die lug opgaan, sal Hooker dit nege uit 10 keer wen. Nog ’n goeie wedstryd op die vleuel vir Suid-Afrika.
Damian de Allende (8,5)
18 lopies met die bal, 17 duikslae. Dit was ’n uitstaande vertoning van die Bok-binnesenter. Hy is beloon met ’n drie en het weer gewys waarom hy as die beste binnesenter ter wêreld beskou word.
Jesse Kriel (7)
Die verdedigende spilpunt van die Bok-agterlyn. Kriel was weer opgewasse vir die stryd teen ’n All Blacks-span wat Suid-Afrika by elke geleentheid wyd probeer rek het. Hy gee altyd alles in die groen-en-goud.
Kurt-Lee Arendse (8,5)
Waarskynlik sy beste wedstryd in die groen-en-goud in ’n geruime tyd. Arendse het 189 aanvallende meter gewen en is beloon met ’n drie toe hy deur die All Blacks se verdediging gegly het uit los spel.
Damian Willemse (7)
Met sy terugkeer ná ’n besering het Willemse ’n stewige vertoning gelewer. Hy was betroubaar onder die hoë balle en bereid om die voordeellyn aan te val.
Plaasvervangers
Die Bok-reserwes het weer eens groot waarde toegevoeg. Afrigter Rassie Erasmus huiwer duidelik nie om hulle in die hitte van die stryd te stuur nie, selfs wanneer die wedstryd nog op ’n mespunt hang.
Cameron Hanekom het ’n uitstekende kameerol vertolk wat ’n drie ingesluit het, asook ’n belangrike duikslag wat tot Kurt-Lee Arendse se drie gelei het. André Esterhuizen het sy klas gewys, Lood de Jager was lewendig en Manie Libbok het die Bok-agterlyn vlot laat funksioneer.