Die lang gewag het uiteindelik tot ’n einde gekom toe die All Blacks Saterdagmiddag by ’n stampvol 10bet Ellis Park-stadion in Johannesburg verwelkom is.
Die stadion het behoorlik gegons met ondersteuners en wedstryddaggees toe die twee rugbyreuse gereed gemaak het vir nog ’n hoofstuk in een van rugby se grootste wedywerings.
Die Webb Ellis-trofeeë is op die veld vertoon, met die voormalige All Blacks-kaptein Sean Fitzpatrick onder diegene wat deel van die spesiale oomblik was.
’n Airlink-vliegtuig het laag oor die stadion gevlieg, waarna ’n kleurvolle lugvertoning en twee kinders gevolg het as deel van die viering van Damian de Allende se 100ste toets vir Suid-Afrika. De Allende is deur sy vrou en twee kinders vergesel, terwyl ’n groot banier ter ere van sy mylpaal op die veld vertoon is.
Die Impi’s het in tradisionele Zoeloe-drag voor die Springbokke die veld betree, waarna vuurwerke die atmosfeer verder aangeblaas het toe die Bokke opgedraf het.
Twee reusetruie – een vir elke span – is ook op die veld vertoon voordat die amptelike verrigtinge begin het.
Nieu-Seeland se volkslied het die seremonie afgeskop, met die kameras wat intussen op die All Blacks-ondersteuners in die skare gefokus het. Daar was geen tekort aan swart truie in die pawiljoene nie.
Die bekende Suid-Afrikaanse popsanger Demi Lee Moore het daarna die Suid-Afrikaanse volkslied gesing, voordat die All Blacks met hul kenmerkende haka die spanning in die stadion verder laat opbou het.
Met die haka afgehandel en die vuurwerke nog vars in die lug, was alles gereed vir die afskop van die jongste hoofstuk in die Greatest Rivalry.