Die dodelikste Ebola-uitbreking in die Demokratiese Republiek die Kongo (DRK) het reeds 3 007 lewens geëis. Volgens die jongste amptelike syfers wat die Kongolese Nasionale Instituut vir Openbare Gesondheid op 2 September bekend gemaak het, is 6 186 gevalle bevestig, met ’n sterftesyfer van 48,6%.
Die instituut het verder gesê dat altesaam 1 409 mense van die siekte herstel het.
Ebola, wat deur kontak met liggaamsvloeistowwe oorgedra word en koors veroorsaak, het die afgelope 50 jaar meer as 15 000 mense in Afrika se lewens geëis.
Die vorige grootste Ebola-uitbreking in die DRK het tussen 2018 en 2020 bykans 2 300 mense dood gemaak uit sowat 3 500 aangemelde gevalle.
Die huidige epidemie tref veral die konflikgeteisterde ooste en noordooste van die land.
Die uitbreking het ontstaan in die afgeleë noordoostelike provinsie Ituri en word veroorsaak deur die Bundibugyo-stam van die virus, waarvoor daar tans geen goedgekeurde entstof of behandeling bestaan nie.
Die virus het inmiddels na ses provinsies versprei en verwoes gebiede waar die teenwoordigheid van die Kongolese staat swak is en onveiligheid weens gewapende groepe algemeen voorkom.
Die gesondheidsreaksie word gekortwiek deur onvoldoende hulpbronne en is oorweldig deur die toename in gevalle, terwyl daar in sommige gemeenskappe groot wantroue teenoor gesondheidsowerhede bestaan.
Verskeie behandelings en entstowwe word tans teen die Bundibugyo-stam getoets.
Goedgekeurde entstowwe is slegs doeltreffend teen die Zaïre-stam, wat verantwoordelik was vir die grootste bekende Ebola-uitbreking tot dusver.
Die Wêreldgesondheidsorganisasie (WGO) het intussen aanbeveel dat ’n Fase 3-kliniese proef met die Ervebo-entstof, wat teen die Zaïre-stam gebruik word, ingestel word.
WGO-kundiges is steeds onseker of Ervebo mense teen die Bundibugyo-stam beskerm, maar voorlopige data dui daarop dat dit ’n mate van beskerming kan bied.
’n Voorraad van 16 250 dosisse vir gebruik deur gesondheidswerkers aan die voorpunt het einde Augustus in die DRK aangekom, waarna inenting kort daarna in Kisangani, die hoofstad van die noordoostelike provinsie Tshopo, begin het.