Die groot veldbrand in die Gironde-streek in suidwes-Frankryk het oornag nie verder versprei nie, het die plaaslike owerhede vroeg Dinsdag gesê.
“Die afgebrande gebied het nie toegeneem nie,” lui die verklaring.
Intussen het Turkye ook van hul vliegtuie aan Frankryk beskikbaar gestel om die brande te help bekamp.
Brandbestryders in Spanje het intussen vordering gemaak ná ‘n “positiewe nag” in hul stryd teen veldbrande wes van Madrid wat die ontruiming van tienduisende mense genoodsaak het, het minister van binnelandse sake Fernando Grande-Marlaska gesê.
Macron waarsku
Die Franse president Emmanuel Macron, wat Maandagaand ‘n krisissentrum in Bordeaux besoek het wat deur ‘n reuseveldbrand bedreig word, het gesê: “Die komende weke gaan moeilik wees en ons moet uithou.”
Hy het gesê ‘n tweede groot brand in die Landes-streek, verder suid, is nou onder beheer, maar hou steeds ‘n bedreiging in.
Dié brand het die ontruiming van 30 000 mense genoodsaak, hoewel owerhede gesê het 15 000 inwoners reeds kon terugkeer huis toe.
Nuwe hittegolf in Spanje
Spanje se meteorologiese diens, AEMET, het amptelik aangekondig dat ‘n nuwe hittegolf Woensdag sal begin en tot die einde van die week sal duur.
Die agentskap het vroeër gewaarsku dat temperature skerp sal styg en humiditeit oor groot dele van Spanje sal daal, wat die risiko van veldbrande tot baie hoog of uiters hoog oor bykans die hele land sal verhoog.
“Hierdie situasie sal voortduur of selfs in die komende dae vererger,” het die agentskap gesê.
Temperature sal na verwagting ook weer in Frankryk styg, waar twee groot veldbrande langs die Atlantiese kus woed.
Spaanse premier doen beroep
In reaksie op die voorspelling het die Spaanse premier Pedro Sánchez gesê:
“Ek vra vir begrip en doen ‘n beroep op alle burgers regoor die land om uiters versigtig te wees en elke moontlike voorsorgmaatreël te tref.”
“Ons staan moeilike en uitdagende ure voor,” het hy gewaarsku.
EU stuur nog vliegtuie
Die Europese Unie het aangekondig dat hy bykomende vliegtuie na Spanje sal ontplooi om met die bestryding van die veldbrande te help.
Die EU se kommissaris vir krisisbestuur, Hadja Lahbib, het aan AFP gesê: “Ons het tans nege lugbates op die terrein ontplooi, en môre sal ons 11 hê, afkomstig uit ons Europese strategiese reserwe.”
Brande in Portugal
Verskeie veldbrande het ook in die noorde en middel van Portugal uitgebreek.
Meer as 1 000 brandbestryders en ander nooddienste, ondersteun deur sowat 20 vliegtuie en helikopters, is besig om die vlamme te bestry, het die Portugese burgerlike beskermingsdienste gesê.