Die Stad Johannesburg het die hoogste aantal voorvalle aangeteken met 1 077 skietvoorvalle, gevolg deur die Stad Ekurhuleni met 848 gevalle.
Die DA se Gautengse woordvoerder oor gemeenskapsveiligheid, Michael Sun, sê die syfers toon die omvang van die krisis wat gemeenskappe regoor die provinsie raak.
“Skietery het ‘n daaglikse realiteit geword wat mense in geweldgeteisterde gemeenskappe laat wonder of die volgende koeël hul huis sal tref, ‘n geliefde sal verwond of ‘n onskuldige lewe sal eis,” het Sun gesê.
Die data toon ook beduidende uitdagings binne die strafregstelsel. Slegs 609 sake (21%) het tot inhegtenisnemings gelei, terwyl net 425 sake (15,1%) na die Nasionale Vervolgingsgesag (NVG) vir vervolging verwys is.
Onlangse voorvalle, insluitend ‘n massa-skietery in Cleveland waarin 12 mense dood is, beklemtoon die erns van vuurwapengeweld in die provinsie. Gebiede soos Westbury, Eldoradopark en Bekkersdal word steeds deur bendeverwante geweld geteister.
Die statistieke plaas Gauteng boaan die land se misdaadsyfers vir skietvoorvalle en vuurwapenverwante misdade.