Meer as 13 jaar ná die vrystelling van Grown Ups 2 is dit nou amptelik: Grown Ups 3 is in ontwikkeling, met Adam Sandler en die meeste van die oorspronklike rolverdeling wat terugkeer. Netflix het die nuus in Mei bevestig en produksie het vandeesweek in New Jersey afgeskop.
Sandler het die eerste foto van die herenigde rolverdeling op sosiale media gedeel met die woorde: “We missed you.” Chris Rock, Kevin James, David Spade, Rob Schneider, Salma Hayek, Maria Bello en Maya Rudolph is almal terug vir die derde rolprent. Nuwe gesigte sluit onder meer Deon Cole, Bailee Madison en Julie Bowen in.
Die draaiboek is deur Sandler en sy jarelange medewerker Tim Herlihy geskryf, terwyl Kyle Newacheck die regie behartig. Anders as die eerste twee rolprente, wat deur Dennis Dugan geregisseer is, sal die derde fliek eksklusief op Netflix verskyn. ’n Amptelike vrystellingsdatum is nog nie aangekondig nie.
Die oorspronklike Grown Ups, wat in 2010 uitgereik is, het wêreldwyd meer as $270 miljoen by die loket verdien en in 2013 tot ’n opvolg gelei. Die derde rolprent volg die groep vriende in ’n nuwe lewensfase nadat hul kinders grootgeword het. Volgens berigte sal die fliek ook hulde bring aan die ontslape akteur Cameron Boyce, wat in die vorige rolprente Lenny se seun vertolk het.
