Iran se owerhede het Saterdag gevra vir die vrylating van drie vlieëniers wat volgens hulle tydens die oorlog in die Midde-Ooste in Katar gevange geneem is.
“Drie vlieëniers van Iran is lewendig deur Katari-kommando’s gevange geneem nadat hul Su-24-vegvliegtuie tydens die oorlog neergestort het,” het generaal Mohammad Bagherzadeh volgens die Fars-nuusagentskap gesê.
“Javad Salehi, Abdolmajid Dashtian en Omran Behraveshian word al ses maande lank deur Katari-magte aangehou,” het hy in ’n brief aan die Internasionale Komitee van die Rooi Kruis gesê.
Bagherzadeh het in die brief vir hul vrylating gevra en gesê die vlieëniers is nie toegelaat om hul families te sien of met hulle kontak te maak nie.
Die Iraanse weermag het verlede maand gesê hy het die liggaam van die Iraanse vlieënier Majid Kazemi teruggevind wat tydens ’n aanval op die Al Udeid-lugbasis in Katar vroeg in Maart gesterf het.
Iran het voorheen gesê die ander vlieëniers word vermis, maar nuus oor hul beweerde gevangenskap is destyds nie bekend gemaak nie.
Die Al Udeid-lugbasis in Katar huisves voorwaartse komponente van die Amerikaanse Sentrale Kommando (CENTCOM), asook dié kommando se lugmag- en spesiale-operasiesmagte.
Dit is die grootste Amerikaanse basis in die streek.
Oorlog
Die oorlog in die Midde-Ooste het op 28 Februarie uitgebreek toe die Verenigde State en Israel aanvalle op Iran geloods het, waarop Iran met aanvalle regoor die streek gereageer het.
Diplomatieke pogings het tot ’n wapenstilstand in April gelei, wat byna 40 dae se gevegte beëindig het. Dit is gevolg deur die ondertekening van ’n raamwerk vir vredesonderhandelinge in Junie, maar dié onderhandelinge het later in duie gestort.
Iran en die Verenigde State het sedertdien sporadies vuur gewissel, met die gevegte wat hoofsaaklik in die suide van Iran en rondom die strategiese Straat van Hormoes gekonsentreer was.
Daar is sedert laat Julie ’n blaaskans in die gevegte.