Iran het Sondag Golf-infrastruktuur geteiken, brandstoftenks by Koeweit se internasionale lughawe getref en ’n ontsoutingsaanleg in Bahrein beskadig terwyl Tehran sy missiel- en hommeltuig-aanvalle teen sy buurlande vir ’n tweede week voortgesit het.
Twee grenswagte is dood “terwyl hulle hul nasionale plig uitgevoer het”, het Koeweit se departement van binnelandse sake gesê sonder om uit te wei.
Iran het buurlande geteiken nadat Amerika en Israel ’n uitgebreide lugveldtog teen Iran begin het, met 16 mense wat in die Golf-state dood is sedert die oorlog begin het, volgens AFP se beraming.
Pres. Massoed Pezesjkian van Iran het Sondag gewaarsku dat die Islamitiese republiek “gedwing sal word om op te tree” teen buurlande indien hul grondgebied gebruik word om dit aan te val.
Pezesjkian het Saterdag buurlande wat militêre basisse huisves, om verskoning gevra vir aanvalle op hul grondgebied.
Saoedi-Arabië, die Verenigde Arabiese Emirate, Katar en Koeweit het almal nuwe aanvalle aangemeld, nadat harde ontploffings die vorige dag in Dubai en Bahrein se Manama gehoor is.
Brandstoftenks by Koeweit se internasionale lughawe is in ’n hommeltuig-aanval geteiken, het die weermag gesê.
Die amptelike Kuwait News Agency het gesê ’n brand by die lughawe is onder beheer gebring en geen “beduidende beserings” is aangemeld nie.
Die weermag het die hommeltuig-aanval “’n direkte aanval op noodsaaklike infrastruktuur” genoem.
’n Afsonderlike verklaring het gesê “sommige burgerlike fasiliteite het materiële skade gely as gevolg van puin van onderskeppingsoperasies”.
Hommeltuie
Koeweit se nasionale oliemaatskappy het aangekondig dat sy produksie van ruolie as ’n voorsorgmaatreël verminder word, terwyl die land se weermag Sondag gesê het dit het op verskeie hommeltuig- en missielaanvalle gereageer.
Bahrein se departement van binnelandse sake het Sondag gesê ’n Iranse hommeltuig-aanval het ’n waterontsoutingsaanleg beskadig. Die land het Iran daarvan beskuldig dat dit burgerlike infrastruktuur “lukraak” teiken.
Iran se Revolusionêre Wag het Saterdag gesê dit het Amerika se Juffair-basis in Bahrein getref, en bygevoeg dit is vroeër die dag gebruik om ’n Iranse ontsoutingsaanleg aan te val.
Bahrein se nasionale kommunikasiekantoor het later gesê die aanval op die ontsoutingsaanleg het geen uitwerking op watervoorrade of netwerkkapasiteit gehad nie.
Vallende missielpuin het ook drie mense beseer en ’n universiteitsgebou in die Muharraq-gebied beskadig, het die departement van binnelandse sake in ’n afsonderlike verklaring gesê.
Saoedi-Arabië se departement van verdediging het Sondag gesê dit het 33 hommeltuie onderskep, en bygevoeg daar is geen berigte van skade of slagoffers van die aanvalle nie.
Een hommeltuig het die Shaybah-olieveld in die suidooste van die land geteiken, het Saoedi-Arabië se departement van verdediging gesê.
‘Tot die beskikking van die vyand’
Die VAE het gesê sy lugverdediging reageer op “inkomende missiel- en hommeltuig-bedreigings van Iran”, terwyl Katar gesê het 10 ballistiese missiele en twee kruismissiele wat die vorige dag van Iran afgevuur is, is meestal sonder slagoffers onderskep.
Ondanks die Iranse president se verskoning aan die Golf-lande vir vroeër aanvalle, het sy hoof van die regbank ure later gesê aanvalle sal voortgaan op terreine in Golf-lande wat “tot die beskikking van die vyand” is.
Pres. Mohammed bin Zayed Al Nahyan van die Verenigde Arabiese Emirate het in ’n seldsame televisie-toespraak gesê die Emirate is in “’n tydperk van oorlog” en “sal sterker daaruit te voorskyn kom”.
Dubai het Saterdag sy hooflughawe – die wêreld se besigste vir internasionale verkeer – kortliks gesluit nadat owerhede gesê het ’n ongeïdentifiseerde voorwerp is naby onderskep.
’n Getuie het aan AFP vertel van ’n harde ontploffing in die gebied, gevolg deur ’n rookwolk. Beeldmateriaal wat deur AFP geverifieer is, het die geluid van ’n hommeltuig opgeneem gevolg deur ’n harde ontploffing en rookwolke naby ’n lughawe-saal.
Die regering het gesê daar was “’n geringe voorval as gevolg van die val van puin ná ’n onderskepping”, sonder om die lughawe direk te noem. Dit het gesê daar was geen beserings nie.