Springbok-afrigter Rassie Erasmus het bevestig dat Cheslin Kolbe ’n gebreekte kakebeen opgedoen het en nie saam na die Verenigde State sal reis vir die vierde toets van die Greatest Rivalry-reeks teen die All Blacks nie.
Kolbe moes reeds vroeg in die eerste helfte die veld verlaat tydens Suid-Afrika se oorwinning van 29-24 oor Nieu-Seeland in Soweto nadat hy Luke Jacobson getakel het.
“Cheslin het sy kakebeen gebreek,” het Erasmus ná die wedstryd gesê.
Hoewel dit ’n groot terugslag vir die Springbokke is, sal Damian Willemse deel wees van die groep wat na Baltimore reis.
“Damian Willemse en Canan sal volgende week gereed wees,” het Erasmus gesê.
Verskeie ander spelers sal ook nie die reis na die VSA meemaak nie.
“Die ander manne wat agterbly, is Carlü Sadie, Ntuthuko Mchunu, Boan Venter en Ben-Jason Dixon, wat steeds harsingskuddingsimptome toon.”
Skrumskakel Herschel Jantjies, wat nog nie in die reeks gespeel het nie, is wel deel van die reisgeselskap.
“Herschel sou eintlik tuisgebly het, maar omdat Cheslin nou agterbly, reis Herschel saam met ons.”
“Grant Williams kan ook vleuel speel, Aphelele Fassi is gereed, en Quan Horn gaan ook saam.”
Nieu-Seeland sal op sy beurt sonder die dienste van kaptein Ardie Savea moet klaarkom nadat hy laat in die eerste helfte met ’n skouerbesering die veld verlaat het.
“Ja, dit is sy skouer,” het All Blacks-afrigter Dave Rennie gesê oor sy sterspeler, wat twee drieë in Soweto gedruk het.
“Ek weet nie of dit uit die pot gespring het of nie, maar hy sal beslis nie saam na die Verenigde State reis nie.”