Die voormalige Springbok-afrigter Nick Mallett het sy mening gedeel oor die komende Greatest Rivalry-reeks tussen die Springbokke en die All Blacks, met die eerste toets wat Saterdag op Ellispark plaasvind.
Daar was reeds heelwat woordewisselings in die aanloop tot die wedstryd, met albei spanne wat kritiek op mekaar se spel uitgespreek het.
Nieu-Seeland wil hê wedstrydbeamptes moet toesien dat die Springbokke nie die spel vertraag nie, aangesien ’n hoër tempo hul vinnige speelstyl onder afrigter Dave Rennie sal bevoordeel.
Die Springbokke het op hul beurt die All Blacks se oortredings by die afbreekpunte, sowel as hul verdediging van dryfmaalbewegings, uitgelig as aspekte waarop beamptes fyn moet let.
Mallett het op die Talking Boks-podsending gesê dit is gebiede wat albei spanne noukeurig sal moet bestuur.
“Ek hoop ons onthou hierdie reeks vir die rugby en nie vir skeidsregterbesluite, geel kaarte en rooi kaarte nie,” het Mallett gesê.
Hy het daarop gewys dat die skeidsregters gedurende die reeks sal fokus op spelerveiligheid, met Engeland se Matthew Carley wat die fluitjie vir die eerste toets sal blaas.
“Veiligheid is ’n groot kwessie, en ek is seker die skeidsregters gaan baie duidelik daaroor wees.
“Jy mag nie jou skouer uitdruk tydens ’n skoonmaakaksie of ’n duikslag nie, en jy mag ook nie met ’n speler in die lug inmeng tydens ’n lynstaan nie, of hy nou of die ondersteunende speler is.”
LEES | Greatest Rivalry: Kirwan se wolhaarstorie oor Rassie skop die bal heeltemal mis
Mallett het gesê dit is juis oortredings waarvoor die All Blacks in die verlede gestraf is.
“Nieu-Seeland het baie goed geraak met hierdie . . . onderduimshede,” het Mallett gesê.
“Wanneer jy ’n lynstaan vyf meter van hul doellyn af kry, is hulle heeltemal bereid om ’n strafskop af te staan eerder as om ’n drie toe te laat.
“Ek hoop die skeidsregters sal ferm en konsekwent optree.”
LEES | Greatest Rivalry: Só kan Bok-span vir 1ste All Blacks-toets lyk
Mallett meen die Springbokke het ook ’n verantwoordelikheid om binne Wêreldrugby se 30-sekonde-reël te bly wanneer hulle vaste fasette opstel.
“Ek wil hê hulle moet ook duidelik met ons wees en sê, as ons bymekaarstaan en ’n lang bespreking oor ’n lynstaan voer: ‘Kom ons kry die bal binne 30 sekondes in spel,’” het Mallett gesê.
“Dit is wat die reël bepaal. Die skrum moet binne 30 sekondes gevorm word. Kom ons doen dit.”
Saterdag se toets skop om 17:10 af, met albei spanne wat later Donderdag aangekondig sal word.