’n Voormalige Thaise LP het Maandag ’n plaaslike regeringsamptenaar in helder daglig oor ’n finansiële dispuut doodgeskiet voordat hy in hegtenis geneem het en by die polisiekantoor aan joernaliste erken het dat hy die skietery uitgevoer het.
Die aanval het buite ’n regeringsgebou in die provinsie Nonthaburi, noord van Bangkok, plaasgevind, slegs enkele dae ná ’n skietery by ’n skool in dieselfde streek wat vrae oor wapenbeheer in Thailand laat ontstaan het.
Die voormalige LP, Chalong Riewrang, het ná sy inhegtenisneming, met polisiebeamptes aan weerskante van hom, aan verslaggewers gesê hy het probeer om met Thongchai Yenprasert oor geld te praat.
“Ek het hom na sy motor gevolg en teen die motor se venster geklop en gesê ek wil praat. Hy het gesê hy wil nie praat nie, toe trek ek my vuurwapen,” het Chalong erken.
“Ek het nie bedoel om hom te skiet nie, maar sy bestuurder het ’n vuurwapen getrek en dit op my gerig, toe skiet ek.”
Thongchai, wat voorsitter van die plaaslike regeringsadministrasie van Nonthaburi was, het later aan sy wonde beswyk. Hy is glo in die nek getref en het baie bloed verloor.
Thongchai se bestuurder is ook in die voorval getref en in sy regterarm gewond, maar het die operasie suksesvol ondergaan.
Private aangeleentheid
Chalong het erken dat hy die enigste persoon was wat geskiet het tydens die voorval, maar die plaaslike polisiehoof, Wattana Yeechin, het vroeër aan verslaggewers gesê “albei kante het vuurwapens gehad”.
’n Vuurwapen is in Thongchai se voertuig gevind, maar dit is nie gebruik nie. CCTV-beeldmateriaal het volgens Wattana gewys dat slegs Chalong sy vuurwapen van naby afgevuur het.
Wattana het gesê die dispuut het oor etlike miljoene baht gegaan – tienduisende dollars.
“Dit was ’n private aangeleentheid. Volgens sy bekentenis het dit gegaan oor geld wat die voorsitter etlike jare gelede by hom geleen het, en hy het verskeie kere gevra dat die geld terugbetaal word,” het hy gesê.
Die goewerneur van Nonthaburi, Chestha Mosikarat, het vroeër aan verslaggewers gesê die verdagte en die slagoffer was “jare lank vriende” en dat die voorval waarskynlik uit ’n misverstand ontstaan het.
Miljoene vuurwapens
Thailand het een van die hoogste vlakke van vuurwapeneienaarskap in die streek, met na raming 10 miljoen vuurwapens in omloop – ongeveer een vir elke sewe inwoners.
Vrydag het ’n 14-jarige seun die grootouers wat hom grootgemaak het in Nonthaburi doodgeskiet voordat hy ses ander mense by sy skool doodgeskiet het en daarna die vuurwapen teen homself gedraai het. (Die dodetal het intussen tot nege gestyg)
Amptenare het sedertdien strenger wapenwette belowe, maar vorige beloftes het nie daarin geslaag om herhaalde skietvoorvalle te voorkom nie.