Henry Pollock sê hy sien uit na die uitdaging om teen die Bokke in die Nasieskampioenskap te speel, en hy verloor geen slaap oor wat Suid-Afrikaners van hom dink nie.
Die Northampton Saints- en Engeland-losskakelvoorspeler het verlede naweek ’n uitstaande vertoning gelewer toe die Saints die Exeter Chiefs met 26-17 in die Engelse Premierliga-eindstryd geklop het. Dit het sy status as een van die mees besproke spelers in die spel verder versterk voor die afskop van die internasionale seisoen.
Toe hy ná die eindstryd gevra is of hy weet waarom Suid-Afrikaners nie van hom hou nie, het Pollock hom min daaraan gesteur.
“Nee. Hulle kan praat soveel as wat hulle wil. Ek dink ek hou net aan opdaag,” het hy aan verslaggewers gesê.
En dit is presies wat hy beplan om te doen wanneer Engeland na die Suidelike Halfrond reis.
“Ek sien ongelooflik baie daarna uit. Ons het drie groot, groot toetswedstryde teen Suidelike Halfrond-spanne in die Nasieskampioenskap ,” het Pollock gesê.
“Die Sesnasiesreeks het nie verloop soos ons gehoop het nie, en dit pla ons steeds ’n bietjie. Maar daar is geen groter uitdaging as om na Suid-Afrika te gaan en weg van die huis af op hoogte in een van die grootste stadions ter wêreld te speel nie. Dit is die soort dinge waarvan jy droom.”
Pollock geniet nie juis groot gewildheid in Suid-Afrika nie, waar verskeie voormalige spelers hulle teen sy manewales uitgespreek het.
Verlede jaar was die Springbok-legende Schalk Burger besonder reguit in sy beoordeling van die 21-jarige.
“Hy is ’n TikTok-danser of wat ook al hy is, en speel dan ’n bietjie rugby oor naweke,” het Burger gesê. “Sy hoofwerk is om op sosiale media te wees.”
Die voormalige OP- en Stormers-agsteman Harold Karele het selfs verder gegaan en gewaarsku dat Pollock se gedrag op die veld nie teen die Springbokke op toetsvlak geduld sal word nie.
“In ons dae sou hy tande verloor het,” het Karele gesê. “Adri Geldenhuys het ouens sommer geslaan wat net hul arm by losskrumme teruggetrek het. Maar ek glo rugby sal Henry self regruk. Hy moet nou ophou, anders gaan rugby hom breek. Daar is nie plek vir pronkponies in die spel nie.”
Pollock lyk egter heeltemal onaangeraak deur die kritiek.
Suid-Afrika en Engeland pak mekaar op 4 Julie op Ellispark in die openingswedstryd van die Nasieskampioenskap.