Suid-Afrika se amptelike werkloosheidskoers het in die tweede kwartaal van 2026 tot 33,6% gestyg, die hoogste vlak in vier jaar, terwyl die land met ’n toenemende werkkrisis worstel.
Die kwartaallikse arbeidsmagopname wat deur Stats SA vrygestel is, toon dat die aantal werklose mense met 345 000 tot 8,5 miljoen toegeneem het, terwyl die aantal werkendes met 16 000 tot 16,7 miljoen afgeneem het vergeleke met die eerste kwartaal van 2026.
Die amptelike werkloosheidskoers het met 0,9 persentasiepunte gestyg vanaf 32,7% in die eerste kwartaal. Die uitgebreide werkloosheidskoers, wat ook mense insluit wat ontmoedig is om werk te soek, staan nou op 43,8%, die hoogste vlak in vier jaar.
Ekonomiese hervorming te stadig, waarsku DA-leier
Die DA-leier, Geordin Hill-Lewis, het die tempo van ekonomiese hervorming veroordeel en gesê verandering vind heeltemal te stadig plaas om die werkloosheidskrisis aan te spreek.
“Suid-Afrika se werkkrisis word erger, nie beter nie. Ekonomiese hervorming vind teen ’n veel te stadige tempo plaas om groei te stimuleer teen die vlak wat nodig is om werk te skep. Suid-Afrika het nie ’n tekort aan ekonomiese potensiaal nie. Wat ontbreek, is dringendheid,” het Hill-Lewis gesê.
Die DA-leier het beklemtoon dat ondernemings en beleggers steeds gekniehalter word deur oormatige rompslomp, onbetroubare basiese dienste, swak hawens en spoorinfrastruktuur, asook misdaad wat dit moeiliker en duurder maak om te bou, te belê en mense in diens te neem.
“Suid-Afrika se sentrale nasionale doelwit moet wees om die ekonomie teen ’n aansienlik vinniger tempo te laat groei sodat meer mense werk kan kry. Hervorming kan nie voortgaan teen ’n tempo wat heeltemal losstaande is van die omvang van die werkloosheidskrisis nie. Groei kan nie net een prioriteit onder baie wees nie. Dit móét die prioriteit wees,” het hy gesê.