’n Derde voorval by ’n hoërskool-rugbywedstryd binne twee weke het kommer oor toeskouers se gedrag by skoolsportbyeenkomste verder laat toeneem.
Bronagh Hammond, woordvoerder van die Wes-Kaapse Onderwysdepartement (WKOD), het gesê toeskouers het Saterdag twee keer tydens die o.19A-wedstryd tussen Hottentots-Holland Hoërskool (HHH) en De Kuilen Hoërskool die veld binnegestorm en betrokke geraak by konfrontasies met spelers. ’n HHH-speler het na bewering ook die wedstrydskeidsregter fisiek gekonfronteer.
Die wedstryd was ’n interskolekragmeting wat by De Kuilen Hoër in Kuilsrivier plaasgevind het. Dit was die vyfde jaarlikse byeenkoms tussen die skole, met seuns- en meisiespanne wat aan rugby, netbal en ander sportkodes deelgeneem het.
Dit is die derde ernstige voorval by ’n skolerugbywedstryd binne twee weke. Tydens die jaarlikse derby tussen Fairmont en The Settlers High School by Fairmont in Durbanville op Saterdag 1 Augustus het die skeidsregter die wedstryd gestop en opgeskort nadat ’n Fairmont-speler na bewering ’n rassistiese belediging teenoor ’n speler van The Settlers gebruik het.
Op dieselfde dag is ’n Virseker Noordvaal-bekerwedstryd tussen Menlopark en Dr EG Jansen Hoërskool in Pretoria laat vaar nadat ’n grootskaalse bakleiery tussen ouers en leerders uitgebreek het.
Die wedstryd tussen EG Jansen en Menlopark moes gestaak word nadat ’n volskaalse bakleiery langs die veld uitgebreek het.
By die interskolebyeenkoms tussen HHH en De Kuilen het die dag vir die grootste deel positief verloop totdat probleme tydens die eerstespan-rugbywedstryd ontstaan het.
“Hierdie gedrag word as onaanvaarbaar beskou,” het Hammond gesê en bevestig dat niemand ernstig beseer is nie.
Sy het bygevoeg dat die skeidsregter geen fisieke beserings opgedoen het nie.
Op Maandag 17 Augustus het HHH se skoolhoof, Francois Fouché, ’n verklaring op die skool se Facebook-blad uitgereik waarin hy die voorval aangespreek het.
“Geen wedstryd tussen twee spanne behoort te eindig soos die rugbywedstryd Saterdag geëindig het nie, veral nie by ’n opvoedkundige instelling nie,” lui die verklaring.
Skeidsregters sal foute maak
Hy het die toeskouers se gedrag as teleurstellend bestempel en volwassenes aangemoedig om beter voorbeelde vir die leerders te stel.
“Skeidsregters sal foute maak. As afrigters en spelers moet ons leer om dit met respek op die speelveld te hanteer.”
Fouché het bevestig dat die skool die saak ondersoek en beslissend sal optree teen die speler en ander persone wat “die skool se naam in onguns gebring het”.