Hoërskool Jan van Riebeeck het die afgelope naweek bewys dat om te werklik te wen, soms veel meer as net met punte te doen het.
Dié skool het hande met Cansa gevat in ’n besondere inisiatief as deel van hul 100-jaargemeenskapsprojekte, en sodoende bewys dat sport se ware krag in die vermoë om gemeenskappe te dien, lê.
Meer as net ’n trui
Die spanne het die naweek met ekstra trots en betekenis op die veld gedraf. Elke trui wat oor skouers getrek is, het met die boodskap gepronk: “Ons speel vir julle.”
Hierdie slagspreuk is opgedra aan elke persoon wat tans teen kanker veg en dié wat die stryd in die verlede gevoer het.
“Dit was baie emosioneel. ’n Paar seuns het hulle truie oorhandig aan hulle oumas en oupas, wat die stryd teen kanker veg . Die slagspreuk vir die naweek was ons speel vir julle,” het Abré van Heerden, hoof van sport by die skool, gesê.
Vrygewigheid wat grense oorskry
Suzuki het ’n ruim borgskap aan die inisiatief geskenk, wat die skoolgemeenskap gehelp het om meer as R10 000 in te samel. Alle ingangsfooie, sowel as die spesiale spandrag wat gedurende die naweek gedra is, is geskenk aan individue wat deur kanker geraak is.
Die bedrag verteenwoordig nie net finansiële steun nie, maar ’n tasbare bewys van ’n gemeenskap wat saamstaan wanneer dit die belangrikste is.
Dit was ’n platform vir verandering, ’n geleentheid om mense se lewens te raak, en ’n bewys dat sport se ware erfenis gemeet word in harte wat verander, nie net wedstryde wat gewen word nie.