Telefoonrekords van ’n berugte kuns- en seldsameboekedief in Brasilië was die sleutel wat die polisie gehelp het om agt gesteelde gravures deur die beroemde Franse skilder Henri Matisse terug te vind nadat dit verlede Desember uit ’n biblioteekuitstalling in São Paulo gesteel is.
Die werke uit Matisse se beperkte uitgawe-kunsboek “Jazz” uit 1947, wat na raming sowat $200 000 werd is, is by ’n huis in die dorp São Bernardo do Campo gevind.
Brasiliaanse owerhede het die 53-jarige Laessio Rodrigues daarvan beskuldig dat hy die diefstal beplan en georkestreer het. Rodrigues, ’n voormalige biblioteekwetenskapstudent, het ’n kriminele rekord met soortgelyke sake.
Die werke is op 7 Desember 2025 uit die Mario de Andrade-biblioteek in São Paulo gesteel waar dit deel was van ’n uitstalling van seldsame boeke.
Volgens die polisie het die diewe ’n veiligheidswag en ’n bejaarde egpaar oorrompel, die gravures en ander items uit ’n glaskoepel waarin dit uitgestal is, gegryp en gevlug.
Groot reputasie
“Laessio is reeds in ander sake skuldig bevind; hy gaan voortdurend in en uit die tronk vir diefstal van boeke en kunswerke,” het Ronald Quene, die hoof van die polisie wat die ondersoek lei, aan AFP gesê.
Rodrigues is in April in hegtenis geneem en wag op verhoor op verskeie aanklagte, insluitend die diefstal van die Matisse-werke.
Sy berugtheid is deels te danke aan ’n Brasiliaanse dokumentêr uit 2017 oor hom, “Cartas para um Ladrao de Livros” (Briewe aan ’n Boekedief).
“Hy is ’n narsis wat vir almal vertel dat hy die grootste kuns- en seldsameboekedief in Brasilië is,” het Quene bygevoeg.
Kort ná die diefstal het die polisie die twee verdagtes met behulp van sekuriteitskamerabeelde geïdentifiseer.
Een is in hegtenis geneem, terwyl die tweede gevlug het. Verdere ondersoek na hul kommunikasie het kontak met Rodrigues aan die lig gebring.
“Ons het verskeie klankopnames gevind van Laessio wat die diefstalle saam met sy makkers koördineer,” het Quene gesê.
“Daar is gesprekke oor alles: die verdeling van die geld, hoeveel elke persoon sou kry.”
Die ondersoek het gelei tot die inhegtenisneming van Rodrigues se man en ’n vrou.
Uiteindelik het ’n forensiese ontleding van Rodrigues se selfoon die deurbraak gelewer oor waar die gesteelde kunswerke gevind kon word.
Die polisie het ’n woning in São Bernardo do Campo naby São Paulo deursoek en die agt werke in ’n kas gevind.
Beamptes het ’n man wat daar gewoon het in hegtenis geneem. Hy het aan die polisie gesê hy weet nie waar die werke vandaan kom nie en dat Rodrigues hom gevra het om dit daar te hou.
Benewens die Matisse-werke is vyf illustrasies deur die Brasiliaanse kunstenaar Cândido Portinari ook gesteel. Dit is nog nie teruggevind nie.
Kunswerke terugbesorg
Quene het gesê Rodrigues het “biblioteekwetenskap bestudeer sodat hy kon vasstel of ’n boek waardevol is of nie”, en dat hy voorheen by die biblioteek gewerk het waar die diefstal plaasgevind het.
Rodrigues het glo tydens die voorbereiding vir die rooftog aan sy makkers gesê hy kon nie self daarheen gaan nie omdat hy te bekend is.
AFP kon nie onmiddellik ’n regsverteenwoordiger van Rodrigues bereik nie.
Volgens Jose Silva Parente, São Paulo se munisipale sekretaris vir kultuur, is die gesteelde gravures reeds aan die biblioteek terugbesorg,
Hoewel dit lyk asof die werke nie beskadig is nie, word dit tans ontleed om seker te maak dat dit volledig ongeskonde is, het hy aan AFP gesê.
Dit was nie die eerste keer dat kunsdiewe daarin geslaag het om die werke in die hande te kry nie – volgens die polisie was die werke etlike jare lank in Argentinië vermis voordat dit uiteindelik teruggevind is.