Die Turkse regering het Saterdag sy veldtog teen die grootste opposisieparty, die CHP, voortgesit met tientalle inhegtenisnemings wat gemik was op ‘n distrik in die hoofstad, Ankara, wat deur die party bestuur word.
Volgens mediaberigte is 27 mense tydens klopjagte Saterdag vroegoggend in Cankaya in hegtenis geneem. Hulle is deel van altesaam 36 mense wat in ‘n lasbrief genoem word wat deur Ankara se staatsaanklaer uitgereik is.
Die lasbrief verwys na bewerings van die stigting van, of lidmaatskap van, ‘n kriminele organisasie, omkopery en tenderknoeiery.
Onder die persone wat in die lasbrief genoem word, is Cankaya se burgemeester, Huseyin Can Guner.
Die inhegtenisnemings volg terwyl Turkye se oudste politieke party ‘n toenemende krisis beleef nadat ‘n hof die verkose partyleier, Ozgur Ozel, uit sy amp onthef en sy verslane voorganger, Kemal Kilicdaroglu (ook bekend as KK), weer as leier aangestel het.
Die hoogs omstrede beslissing van ‘n hof in Ankara, wat die party se leierskapsverkiesing van 2023 weens bewerings van stemkopery tersyde gestel het, word deur kritici beskou as die jongste poging van president Recep Tayyip Erdogan om sy politieke teenstanders te verlam.
Die stap het groot kommer laat ontstaan oor die toestand van demokrasie en die oppergesag van die reg in Turkye.
Ná Saterdag se klopjagte het Ozel, wat tans die suidelike stad Adana besoek, partylede aangemoedig om in solidariteit voor die stadsaal van Cankaya byeen te kom.
Honderde CHP-amptenare is reeds as deel van voortgesette ondersoeke na beweerde korrupsie in hegtenis geneem, onder wie die burgemeester van Istanboel, Ekrem Imamoglu, wat algemeen beskou is as een van die min politici wat Erdogan by die stembus kon verslaan.
Die druk op die CHP het skerp toegeneem sedert die party se oorweldigende oorwinning oor Erdogan se AKP in die plaaslike verkiesing van 2024. Syfers wat einde Junie bekend gemaak is, toon dat minstens 26 van die party se burgemeesters reeds agter tralies was weens verskeie beweerde korrupsie-oortredings.
Die CHP se klinkende oorwinning in die plaaslike verkiesing het minder as ses maande gekom nadat Ozel as partyleier oorgeneem het.
Ná Imamoglu se inhegtenisneming het Ozel ‘n sleutelrol gespeel om Turkye se grootste straatbetogings in meer as ‘n dekade te mobiliseer, wat daartoe gelei het dat die party se steun in meningspeilings toegeneem het.
Die 51-jarige Ozel, ‘n uitgesproke kritikus van Erdogan, appelleer teen die hofbeslissing in Ankara. Hy het egter Vrydag gesê dat hy ‘n nuwe party sal stig indien sy regspogings misluk.
Hy het dié stap in ‘n YouTube-onderhoud met die joernalis Unsal Unlu as ‘n “ergste-geval-scenario” beskryf.