Twaalf lede van die Suid-Afrikaanse Polisiediens (SAPD) wat die afgelope finansiële jaar in die uitvoering van hul pligte gesterf het, is Sondag tydens die jaarlikse Nasionale Herdenkingsdag by die Uniegeboue in Pretoria vereer.
President Cyril Ramaphosa het die families en kollegas van die gevalle lede toegespreek en gewaarsku dat ’n aanval op ’n polisiebeampte ’n aanval op die staat is.
“Wanneer ’n misdadiger ’n wapen op ’n polisiebeampte rig, konfronteer hulle nie bloot daardie beampte nie, maar die gesag van die Republiek van Suid-Afrika,” het Ramaphosa gesê.
Die 12 lede het tussen 1 April 2025 en 31 Maart 2026 gesterf. Nege van hulle was van Gauteng, met een elk uit die Noordwes, KwaZulu-Natal en Mpumalanga. Die name van die lede is tydens die seremonie op die SAPD se Roll of Honour verewig.
Vanjaar se getal is egter aansienlik laer as die 27 polisielede wat ’n jaar gelede herdenk is. Dit is die laagste aantal in die onlangse jare.
Ramaphosa het beklemtoon dat die syfers nie die menslike verlies agter elke naam moet verbloem nie. Onder vanjaar se gevalle was ’n ma van drie en ’n pa wat sewe maande oue tweelinge agtergelaat het.
“Agter elke moord op ’n polisiebeampte is ’n gesin wie se lewe vir altyd verander is,” het Ramaphosa gesê.
Die president het gesê diegene wat polisielede teiken, moet gearresteer word en die volle mag van die reg in die gesig staar.
Die jaarlikse herdenkingsdag word op die eerste Sondag van September gehou om polisielede te onthou wat gedurende die voorafgaande 12 maande in die uitvoering van hul pligte gesterf het.