Wanhopige Venezolane het Donderdag teen tyd gewerk om geliefdes te vind en te red wat onder die puin van ineengestorte geboue vasgekeer is nadat twee groot aardbewings minstens 235 mense dood en duisende meer beseer het.
Geboue het gekraak, verbrokkel en gevaarlik skeef gehang nadat die aardbewings Woensdagaand binne minder as ’n minuut van mekaar Noord-Venezuela getref het. Die Amerikaanse agentskap vir geologiese opname het die aardbewings op onderskeidelik 7,2 en 7,5 op die Richterskaal gemeet.
Kragtige naskokke het die streek Donderdag steeds geruk terwyl die minister van gesondheid, Carlos Alvarado, gesê het die dodetal het tot minstens 235 gestyg, met sowat 4 300 mense wat beseer is.
Reddingspogings het stadig gevorder, met liggame wat ure ná die aardbewings steeds onder die puin sigbaar was. Vir sommige van die vasgekeerde en beseerde slagoffers het die tyd uitgeloop.
In ’n stad in die swaar getrefde deelstaat La Guaira, noord van Caracas, het inwoners magteloos geluister hoe ’n jong meisie ure lank om hulp roep.
“Ons het mense nodig, militêre personeel, wat kan kom help sodat ons haar kan uitkry,” het die inwoner Dani Rizo (48) gesê.
Kort daarna het die meisie gesterf, het plaaslike inwoners aan AFP gesê.
Elders in La Guaira kon drie mense onder die puin van ’n ineengestorte gebou gehoor word.
“Hulle leef nog. Daar is niks meer wat ons kan doen nie,” het ’n inwoner, Antonio Bermudez, gesê. “Ons het geen gereedskap nie. Ons het geen manier om hulle te help nie.”
’n Dokter by die Domingo Luciani-hospitaal in die stad, wat anoniem wou bly, het gesê kinders word alleen per ambulans ingebring nadat hulle uit die puin gered is.
“Sommige kinders kan hul name gee, terwyl ander met identifikasiebandjies om hul arms hier aankom,” het hy gesê.