Die helikopter wat met vier insittendes aan boord vermis geraak het, is Dinsdagoggend suksesvol in die Krugerwildtuin opgespoor.
Al vier persone is lewend en ongedeerd gevind, het die polisie bevestig. Hulle sluit die vlieënier, twee SAPD-ondersoekbeamptes en ’n omgewingsmisdaad-ondersoeker in.
“Die groep het Maandag veilig in ’n afgeleë gebied geland, maar toe hulle probeer om deur die digte bos te navigeer, kon hulle nie die helikopter vind nie,” het brigadier Donald Mdhluli, nasionale woordvoerder van die polisie, verduidelik.
“Nadat hulle die nag in die veld deurgebring het, is hulle vanoggend deur ’n span opgemerk wat met behulp van ’n SANParke-helikopter vir hulle gesoek het,” het Mdhluli gesê.