Die Verenigde State het geteikende visumbeperkings ingestel teen Suid-Afrikaanse amptenare wat betrokke is by rasgebaseerde diskriminasie en grondonteiening, wat spanning tussen die twee lande verder verhoog.
Die Amerikaanse minister van buitelandse sake, Marco Rubio, het die nuwe beleid dié week aangekondig en gesê dit is gemik op buitelandse burgers wat beleid instel of ondersteun wat rasgebaseerde diskriminasie bevorder, geweld aanhits of grondonteiening sonder vergoeding moontlik maak.
“Die Suid-Afrikaanse volk word in die steek gelaat deur ’n regering wat sy ekonomie vernietig deur ’n obsessiewe fokus op rasgriewe teen die Afrikaner-minderheid,” het Rubio in ’n verklaring op sosiale media gesê.
Die beperkings, wat ingevolge Artikel 212(a)(3)(C) van die Amerikaanse Wet op Immigrasie en Nasionaliteit ingestel is, beteken nie ’n algemene visumverbod vir alle Suid-Afrikaners nie. Dit is spesifiek gemik op individue wat volgens die VSA verantwoordelik is vir die implementering van diskriminerende beleid, asook sekere familielede.
Rubio het gesê die Suid-Afrikaanse regering het versuim om plaaslike misdaad, gewelddadige retoriek en rasgebaseerde diskriminerende beleid teen Afrikaners en ander minderheidsgroepe doeltreffend aan te spreek.
“Diegene wat vir hierdie onreg verantwoordelik is, het geen plek in die Verenigde State nie,” het hy bygevoeg.
Amptenare van die Amerikaanse departement van buitelandse sake het die visumbeperkings beskryf as die “eerste stap in ’n reeks eskalerende maatreëls” om druk op Suid-Afrika oor dié kwessies uit te oefen.
Geen spesifieke individue is tot dusver openbaar as teikens van die beleid geïdentifiseer nie.