Vir iemand wat geweld of mishandeling beleef, kan die besluit om uiteindelik hulp te vra reeds ’n groot stap wees. Die volgende vraag is egter: waarheen gaan jy wanneer jy gereed is om te praat?
Woman4Change het daarom ’n nuwe digitale ondersteuningsdiens bekendgestel wat daarop gemik is om slagoffers en oorlewendes van geweld met praktiese en emosionele ondersteuning te verbind.
Die WFC Survivor SupportLine, wat op WhatsApp beskikbaar is, is volgens die organisasie ontwikkel nadat hulle oor verskeie jare duisende boodskappe van mense ontvang het wat hulp met geweld en mishandeling gesoek het.
Die doel is om die eerste stap na hulp minder ingewikkeld te maak.
Via die diens kan mense onder meer ondersteuning met veiligheidsbeplanning kry, emosionele ondersteuning ontvang en inligting bekom oor sake soos die aanmelding van geweld, beskermingsbevele en mediese sorg.
Die diens kan mense ook na toepaslike organisasies verwys, insluitend skuilings, beraders en regsdienste.
Woman4Change sê die besluit om die diens op WhatsApp te bedryf, is deels gegrond op die feit dat mense reeds daagliks dié platform gebruik. Dit bied ook aan iemand ’n manier om hulp te soek sonder dat hulle noodwendig ’n telefoongesprek hoef te voer.
Die SupportLine bied verskeie opsies, waaronder Talk to Us, waar gebruikers ondersteuning en leiding kan kry; Report a Femicide, waar families inligting oor ’n femisiedood kan deel; Deel My Story, waar mense hul ervarings kan deel; en Crisis Resources, met inligting oor noodnommers, skuilings, regshulp en ander ondersteuningsdienste.
Die diens is gratis, hoewel normale datakoste van toepassing kan wees, en gebruikers hoef volgens Woman4Change nie hul naam te verskaf nie.
Dit is egter nie ’n plaasvervanger vir nooddienste nie.
Die SupportLine funksioneer Maandae tot Vrydae van 09:00 tot 19:00. Ondersteuning word ook oor naweke en openbare vakansiedae gebied om dringende sake na die toepaslike nooddienste te verwys.
Vir mense wat onmiddellik in gevaar is, bly bestaande nood- en ondersteuningsdienste dus belangrik.
Woman4Change se nuwe diens plaas terselfdertyd die fokus op ’n ander deel van die probleem: wat gebeur ná iemand besluit het om nie meer stil te bly nie?
Om hulp te soek beteken nie noodwendig dat iemand reeds weet wat die volgende stap moet wees nie. ’n Slagoffer kan onseker wees oor waar om geweld aan te meld, hoe ’n beskermingsbevel werk, waar om mediese hulp te kry of waarheen om te gaan indien dit nie veilig is om tuis te bly nie.
Dit is juis dié inligting en verwysings wat die organisasie met die nuwe lyn probeer sentraliseer.
Volgens Woman4Change is die helplyn aanvanklik met finansiering van die Kanadese Hoë Kommissie ontwikkel. Die organisasie sê die verdere bedryf van die diens word tans deur skenkings van individue en klein ondernemings ondersteun.
Die bekendstelling kom te midde van Suid-Afrika se voortgesette stryd teen geslagsgebaseerde geweld en femisied.
Vir Woman4Change gaan die diens uiteindelik oor meer as net nog ’n nommer of WhatsApp-kontak.
Dit gaan oor die oomblik wanneer iemand besluit om hulp te vra – en of daar dan ’n duidelike pad vorentoe is.
Die WFC Survivor SupportLine is beskikbaar op WhatsApp by 076 814 5850.