Ruhan Nel het ’n boodskap vir enigiemand wat in die versoeking kom om Leinster se toetswedstryd-ervaring te tel voor afskop by die Aviva-stadion op Saterdag.
Die Stormers-kaptein Ruhan Nel is tydens die voorwedstrydse mediakonferensie voor die Verenigde Rugbykampioenskap-halfeindstryd direk gevra hoe ’n span wat deur beserings uitgedun is die gaping met Leinster se ervaring gaan oorkom
Sy antwoord was verfrissend eenvoudig.
“Op internasionale vlak het hulle baie meer ervaring as ons. Hulle het waarskynlik meer Ierse toetsspelers as wat ons VRK-wedstryde tussen ons het,” het Nel erken. “Maar weereens kom dit neer op die dag self. Uitkloprugby is ’n snaakse ding.”
Nel het ná die Stormers se eie onlangse geskiedenis verwys as bewys dat ervaring nie altyd die deurslag gee wanneer die uitklopwedstryde aanbreek nie.
“Ons het dit die afgelope paar jaar gesien toe ons ons eie VRK-eindstryd gehaal het danksy uitslae wat waarskynlik nie in ons guns moes uitgedraai het nie. Enigiets kan gebeur. Dit gaan letterlik oor die span wat op die dag opdaag.”
Nel het gesê die Stormers fokus op hulself en op wat hulle moet doen om Saterdag te wen.
“As jy op die veld kom en dink daar is Ierse spelers met ’n miljoen toetswedstryde se ervaring voor jou, dink jy te veel daaroor. Aan die einde van die dag is dit 15 teen 15. Dit gaan oor die span met die meeste punte op die telbord.”
Met Sacha Feinberg-Mngomezulu, Seabelo Senatla en ander wat nie beskikbaar is nie, stap die Stormers een van Europese rugby se mees intimiderende stadions binne met ’n uitgedunde groep spelers en word hulle deur byna almal buite hul eie kamp afgeskryf.
Nel steur hom ook nie daaraan nie.
Saterdag om 18:30 sal die Stormers hul woorde met dade moet bewys, maar Nel se selfvertroue is ’n goeie teken vir die Kaapse span.