Twee spelers met sterk Suid-Afrikaanse bande sal vir die Barbarians uitdraf wanneer hulle die Springbokke Saterdag in die Nelson Mandelabaai-stadion aandurf.
Die Stormers se heelagter, Warrick Gelant, is as heelagter gekies, terwyl die Skotland- en Britse en Ierse Leeus-vleuel, Duhan van der Merwe, wat in Suid-Afrika gebore en grootgeword het, op die linkervleuel begin. Die Stormers-stut Ollie Kebble is op die plaasvervangersbank ingesluit.
Die sterbelaaide Barbarians-span, wat deur die voormalige All Black-skrumskakel TJ Perenara gelei sal word, beskik oor 19 internasionale spelers uit 11 lande en beloof om die Springbokke ’n taai toets van hoë gehalte te gee.
Te midde van ’n besige skedule het die BaaBaas tyd in hul besige skedule ingeruim om terug te gee aan die gemeenskap op Jeugdag.
Hulle het ’n oefensessie gehad saam met kinders van die Atlas Foundation-liefdadigheidsorganisasie, en volgens die video op die Barbarians se X-rekening en die glimlagte op almal se gesigte, was dit groot pret vir almal.
- Saterdag se wedstryd skop om 15:00 in Gqeberha af.