Al 96 stappers wat in die Visrivier-canyon in Namibië vasgekeer is ná swaar reën en stygende watervlakke wat uitgangsroetes afgesny het, is teen Maandag veilig ontruim sonder enige beserings wat aangemeld is.
“Dit het gevoel soos om in ’n oorlogsone te wees met die klank van donderweer wat deur die canyon rol. Die weerlig was skrikwekkend,” het Eric McLaren op die Facebook-blad I hiked the Fish River Canyon geskryf en gesê dit het katte en honde gereën.
Op Saterdag, 20 Junie, het hy geskryf die reën het omstreeks 15:00 begin. McLaren en sy groep het kamp opgeslaan en hul tente sowat 40 meter van die rivier af geplaas.
“Nog voordat ons klaar tente opgeslaan het, het die hemel oopgemaak. Dit was donderweer, weerlig en reën vir sewe ure aaneen.”
Om 01:00 moes hulle na hoër grond beweeg en tien minute later was die grond waar die tente gestaan het onder water. Sondagoggend het hulle in die rigting van Pink Rock beweeg nadat hulle gesien het daar was geen deurgang deur die stroomversnellings nie.
McLaren en twee ander het stroomop beweeg waar die water rustiger gelyk het. Hy het ingegaan om die diepte en sterkte van die stroom te toets.
“Vyf meter in was dit borshoogte en ek kon voel hoe die stroom my begin vat. Ons het nêrens heen gegaan nie.”
Gelukkig het sy groep twee satellietfone gehad waarmee hulle op hoogte van die watersituasie gehou kon word en geweet het hulp is op pad. Hulle was ook op hoër grond.
“Om op die verkeerde tyd te probeer deurgaan het, kon baie mense se lewens gekos het,” het hy geskryf en die besluitnemers wat die canyon gesluit en heropen het, asook die reddingspanne, geprys vir die professionele wyse waarop hulle die situasie hanteer het en seker gemaak het almal is ontruim.
“Ek sal hierdie geleentheid om die kragte van die natuur te sien, vir altyd koester,” het die 62-jarige McLaren van Somerset-Wes gesê. Hy het al meer as 30 keer die canyon ingevaar. Hy is ’n gesertifiseerde avontuurgids wat spesialiseer in die Visrivier-canyon en skrywer van die onlangs gepubliseerde Thirty Times Down: A Hiker’s Guide to the Fish River Canyon Trail.