Junior Springbok-afrigter, Kevin Foote, het grootskaalse veranderinge aan sy span gemaak vir Donderdag se tweede wedstryd van die o. 20-Wêreldkampioenskap teen die gasheerland Georgië in Tbilisi.
Die Groep A-wedstryd skop om 18:30 (SA tyd) af en sal regstreeks op SuperSport uitgesaai word.
Foote het slegs vier spelers behou uit die beginspan wat die toernooi verlede Saterdag met ’n oortuigende oorwinning oor Uruguay geopen het. Twee van dié spelers skuif ook na ander posisies vir die kragmeting teen die gasheer.
Slot JD Hattingh is die enigste voorspeler wat vir ’n tweede agtereenvolgende keer in die beginspan is, terwyl drie agterspelers – Hendré Schoeman, Luan Giliomee en Markus Muller – hul plekke in die beginspan behou.
Giliomee, wat teen Uruguay as heelagter begin het, skuif vir Donderdag se wedstryd na losskakel, terwyl Muller op binnesenter sal uitdraf.
Foote het gesê die span het van die begin af beplan om die spelersgroep te roteer, veral weens die kort hersteltyd tussen groepwedstryde.
“Ons is bevoorreg om oor ’n gehaltegroep spelers te beskik wat reeds verskeie kere vanjaar saam gespeel het. Die bestuur van spelers se werkslading is een van die belangrikste aspekte van ’n toernooi soos hierdie, en spanrotasie speel ’n baie belangrike rol daarin.”
Hoewel hy tevrede was met die vertoning teen Uruguay, het Foote gesê die ontleding van die wedstryd het verskeie areas uitgewys waar verbetering nodig is.
“Georgië is ’n baie sterk span in vaste fasette en ’n fisieke teenstander. Omdat ons reeds ’n paar keer vanjaar teen hulle gespeel het, weet ons presies waartoe hulle in staat is.”
Georgië het hul openingsgroepwedstryd met slegs een punt teen Wallis verloor, en Foote verwag dat die gasheer ’n sterk terugkeer sal lewer.
“Hulle is ’n trotse en passievolle rugbynasie en sal teleurgesteld wees ná daardie noue nederlaag teen Wallis. Ons sal dus geestelik en fisiek gereed moet wees vir die uitdaging wat hulle gaan bied.
“Hulle sal ook die steun van ’n passievolle tuisskare hê, wat dit ’n baie moeilike wedstryd gaan maak.”
Ethan Adams (senter) en Khuthadzo Rasivhaga (vleuel) is weens geringe beserings nie vir oorweging beskikbaar nie.