’n Dringende aansoek in die hooggeregshof deur twee geskorsde MK-partylede om hul verwydering tersyde te stel, is Dinsdag van die rol geskrap nadat die regter gesê het hy het nie genoeg tyd gehad om vir die saak voor te berei nie.
Duduzile Zuma-Sambudla, dogter van voormalige president Jacob Zuma, en Nhlamulo Ndhlela, die party se stigter en nasionale woordvoerder, het die aansoek gebring nadat hulle op 18 Junie geskors is.
Die twee het in ’n gesamentlike verklaring gesê Dinsdag se uitslag was prosedureel van aard en het nie op die meriete van hul saak betrekking gehad nie. Hulle het hul regspan opdrag gegee om die saak dringend volgende week weer op die hofrol te plaas.
Agtergrond tot die skorsing
Die MK-party se sekretaris-generaal, Sibonelo Nomvalo, het verlede maand tydens ’n mediakonferensie die onmiddellike skorsing van Zuma-Sambudla en Ndhlela aangekondig en hulle daarvan beskuldig dat hulle in stryd met die party se grondwet, waardes en organisasie belange opgetree het.
Die party beweer Zuma-Sambudla het openbare platforms en sosiale media gebruik om party-eenheid te ondermyn, faksiegebonde narratiewe te bevorder en die leierskap in oneer te bring. Ndhlela is daarvan beskuldig dat hy ongemagtigde mediakonferensies gehou en die party se amptelike standpunte verkeerd voorgestel het.
Albei is ook verbind met gebeure rondom die dood van die MK-party-parlementslid Edward Mzikayise Ntshingila, wat op 4 Junie op 43-jarige ouderdom ná ’n langdurige siekte oorlede is. Die party beweer die twee het die siek parlementslid sonder sy familie se medewete na ’n ander gesondheidsfasiliteit oorgeplaas en sy besittings uit sy parlementêre woning verwyder sonder om sy familielede daarvan in kennis te stel.