Die Amerikaanse president Donald Trump het vandag verklaar dat die skietstilstand met Iran “verby” is, nadat die gevegte weer opgevlam het ná Iranse aanvalle op kommersiële vaartuie in die strategiese Straat van Hormoes.
Trump het tydens ’n Navo-beraad in Turkye die vooruitsig op voortgesette onderhandelinge afgemaak toe hy gevra is of die skietstilstand steeds geldig is.
“Wat my betref, is dit verby,” het Trump gesê. “Dit is net ’n mors van tyd om met hulle te onderhandel. Ek sal ons wonderlike onderhandelaars laat aanhou praat as hulle wil, maar ek sien nie kans daarvoor nie. Ek hou nie van hierdie mense nie.”
Oliepryse het ná sy opmerkings met 5% gestyg.
Die strategiese skeepsroete het ’n brandpunt in die konflik geword, wat laat in Februarie begin het met grootskaalse Amerikaans-Israeliese aanvalle op Iran. Teheran dring daarop aan dat hy beheer oor die waterweg het, eis fooie vir deurgang en dreig vaartuie wat van sy goedgekeurde roete afwyk.
Iranse magte het die afgelope paar dae minstens drie skepe aangeval, wat Dinsdag tot uitgebreide Amerikaanse aanvalle op Iranse teikens gelei het, gevolg deur vergeldingsaanvalle deur Iran op Golfstate.
Golf van aanvalle oor Iran
Iranse staatsmedia het Woensdag berig oor ’n reeks ontploffings rondom die seestraat, waaronder ses op Qeshm-eiland, sewe in die stad Sirik en verskeie ontploffings in die groot hawestad Bandar Abbas.
Verdere ontploffings is ook in die hawestad Bushehr aangemeld, waar Iran se enigste burgerlike kernkragsentrale geleë is. Die stad is naby Kharg-eiland, die land se belangrikste olieterminaal waardeur 90% van Iran se ruolie-uitvoer vervoer word.
Staatsmedia het bevestig dat een lid van die Revolusionêre Wag in die suidweste van Iran dood is.
Die Amerikaners het gesê sy magte het meer as 80 teikens aangeval, waaronder Iranse lugverdedigingstelsels, kusradarinstallasies en 60 klein bote van die Islamitiese Revolusionêre Wagkorps.
Volgens hulle was die doel van die aanvalle “om Iran se vermoë te verswak om voort te gaan met aanvalle op internasionale handel wat deur die internasionale handelsroete vloei”.