Nuwe Amerikaanse lugaanvalle het Woensdag lugverdedigingstelsels in Teheran geaktiveer nadat president Donald Trump gewaarsku het dat hy “nog nie klaar is nie” met Iran in ’n konflik wat die Verenigde State reeds $37,5 miljard (ongeveer R618 miljard) gekos het.
Die oorlog het verder as die strategiese Straat van Hormoes uitgebrei en raak nou ook ’n ander belangrike olievoorsieningsroete in die Midde-Ooste nadat gevegte tussen die twee lande daartoe gelei het dat voorlopige vredesonderhandelinge in duie gestort het.
Die Amerikaanse minister van buitelandse sake, Marco Rubio, het gesê Washington bly oop vir diplomatieke samesprekings met Teheran ondanks die voortgesette militêre optrede.
“Die probleem waarmee ons tans sit, is dat hulle nie die onderhandelinge ernstig opneem nie,” het Rubio tydens ’n vergadering van Suidoos-Asiatiese ministers in Manila aan joernaliste gesê.
Iran se woordvoerder van buitelandse sake, Esmaeil Baqaei, het bevestig dat diplomatieke gesprekke met Washington deur bemiddelaars voortduur.
Aanvalle tref teikens regoor Iran
Die jongste aanvalle het volgens die VSA “militêre logistieke infrastruktuur” geteiken, terwyl Iranse staatsmedia berig het van aanvalle regoor die land, insluitend Bushehr, waar ’n kernkragsentrale geleë is.
“Nuusbronne het enkele minute gelede berig dat lugverdedigingsaktiwiteit in die weste, ooste en noordooste van Teheran gehoor is,” het die staatsuitsaaier op Telegram gesê.
Terwyl die oorlog sy vyfde maand nader en die verkiesing in November voorlê, ervaar Trump toenemende politieke druk om die konflik te beëindig, wat selfs onder dele van sy eie ondersteuners ongewild geword het.
Die Amerikaanse minister van verdediging, Pete Hegseth, het Dinsdag bekend gemaak dat die oorlog reeds $37,5 miljard gekos het terwyl hy ’n versoek vir nog tientalle miljarde dollars aan militêre befondsing verdedig het.
Die Amerikaanse weermag het Dinsdag gesê dit het vir ’n elfde agtereenvolgende nag aanvalle op Iran uitgevoer en militêre teikens aangeval om “Iran se vermoë om kommersiële skeepvaart in die Straat van Hormoes te bedreig, verder te verswak.”