Grey Kollege se eersterugbyspan sal Saterdag meer as ’n bietjie Grey-magic nodig hê indien hy die eerste keer sedert 2019 daarin wil slaag om Paul Roos Gimnasium hier in die Markötter-stadion om te dop.
Die twee spanne se wedstryd in die King Price-derby-reeks skop Saterdag om 14:00 in die Eikestad af.
Grey se losskakel, Darius Erwee, moes verlede jaar in Bloemfontein saam met die vleuel Eddie Mabena vir ’n stukkie briljantheid sorg om uiteindelik met 26-25 as die wenners van die veld te stap.
Die Maroen Masjien se tuisveld het egter die afgelope paar jaar een van sy grootste bondgenote in veral die interskole teen Grey geword. Die span van Stellenbosch het met die twee spanne se laaste ontmoeting hier Grey met 36-3 sy grootste loesing in sy geskiedenis toegedien.
Paul Roos was in die vorige kragmeting in 2022 ook gemaklik met 34-19 baas.
Die tuisspan sal egter Saterdag sonder drie van sy staatmakers – Tiaan Basson (senter), Travis Pheiffer (losskakel) en Werner de Bruin (flank) – moet klaarkom.
Die trio sal Saterdag vir die twee nasionale o.18-spanne teen onderskeidelik Frankryk en Engeland op die veld draf.
Basson was die Maroen Masjien se kaptein, terwyl Pheiffer as generaal ook ’n reuseleemte sal laat. Boonop het De Bruin vanjaar voorlangs meestal die vonk verskaf om Paul Roos se vuur te stook.
Grey het ook spelers in die twee SA spanne met Lamla Mgedezi (heelagter) en Niel du Randt (agtsteman).
The Rugby Factory se Top-10
- Paarl Gim
- Garsfontein
- Stellenberg
- Paul Roos
- Affies
- Paarl Boys High
- Grey College
- Monument
- Hilton College
- Outeniqua
- Lees meer oor die ander skolerugby wat die naweek plaasvind in Die Papier, wat nou op die rakke is en op NovaNews hier.
- Huisaflewering is ook beskikbaar deur On the Dot te e-pos by diepapierintekening@onthedot.co.za of te bel by 087 353 2191.
- ’n Elektroniese koerant kan ook gekoop word by op diepapier.co.za of by Magzter.