Die voormalige prokureur Peet Viljoen sal in aanhouding bly nadat die gespesialiseerde handelsmisdaadhof in Pretoria sy borgtogaansoek Maandag van die hand gewys het.
Viljoen is egter borgtog geweier omdat hy as ’n vlugrisiko gesien word.
Viljoen staan tereg op meer as 400 aanklagte van bedrog, diefstal en korrupsie wat verband hou met ’n beweerde eiendomsbedrogskema van R27,6 miljoen waarby die Johannesburg Eiendomsmaatskappy betrek word en wat na bewering reeds in 2010 begin het.
Viljoen is in Junie by die O.R. Tambo-lughawe in hegtenis geneem, kort nadat hy uit die Verenigde State gedeporteer is, waar hy sowat 100 dae in aanhouding was weens ’n beweerde winkeldiefstalvoorval in Florida.
Hy word sedertdien in die Kgosi Mampuru-gevangenis aangehou.
Viljoen se regsverteenwoordiger, André Steenkamp, het borgtog van R250 000 voorgestel en aangebied dat Viljoen onder huisarres by sy suster se woning in Olympus, Pretoria, geplaas word, met daaglikse aanmelding by die polisie. Hy het aangevoer dat Viljoen vrywillig na Suid-Afrika teruggekeer het en daarom nie ’n vlugrisiko is nie.