Damian de Allende sal Saterdag by ’n elitegroep aansluit wanneer hy sy 100ste toetswedstryd vir die Springbokke speel.
Die ervare senter sal die 10de Suid-Afrikaner word om die mylpaal van 100 toetse te bereik, met die Springbok-afrigter, Rassie Erasmus, wat hom as ’n uitstekende spanman en dienaar van die spel beskryf het.
“Ons is almal baie opgewonde oor Damian, en om hierdie mylpaal in hierdie reeks te bereik, maak dit nog meer spesiaal,” het Erasmus gesê nadat hy sy span vir Saterdag se kragmeting teen die All Blacks aangewys het.
“Hy is ’n uitstekende spanman en dienaar van die spel, so ons hoop ons kan dit vir hom ’n onvergeetlike dag maak.”
Erasmus het egter beklemtoon dat mylpaalgeleenthede nie die Springbokke se aandag van hul taak op die veld sal aftrek nie.
“Sy fokus was die hele week net op hierdie wedstryd,” het hy gesê. “Hy sal beslis nie toelaat dat die geleentheid dit wat hy op die veld moet doen, oorskadu nie.”
- Saterdag se Greatest Rivalry-toets skop om 17:10 op Ellispark, Johannesburg, af. Bespreek kaartjies hier.