Met minder as twee maande voor die begin van die nuwe Verenigde Rugbykampioenskap-seisoen, is die Bulls hard aan die werk met hul voorbereiding vir die taai seisoen wat voorlê.
Nog ’n groot uitdaging wag egter om die draai, naamlik ’n kragmeting teen die All Blacks, wat die manne van Pretoria gaan aandurf ter voorbereiding van hul eerste toets teen die Springbokke.
Bulls-afrigter Johan Ackermann sê die wedstryd is iets waarna hy, sy afrigtingspan en die spelers baie uitsien.
“Waar die All Blacks ook al in die wêreld speel, sien jy die ongelooflike ondersteuning wat hulle geniet en die tradisie wat hulle saambring,” het Ackermann aan die Bulls-webwerf gesê.
“Dit is ’n herinnering wat vir altyd by die spelers sal bly.
“Dit is ’n wonderlike geleentheid om jouself te meet, maar ook om iets te beleef wat jy waarskynlik nog net op televisie gesien het.”
Ackermann het bevestig dat die Bulls, al is hulle nog in die tussen seisoen, alles sal gee in dié wedstryd.
Nadat hulle die All Blacks reeds twee keer in toerwedstryde geklop het, sal die Bulls mik na ’n derde oorwinning oor die Nieu-Seelanders.
“Dit is nie ’n opwarmingswedstryd waar jy dertig-iets spelers gebruik nie. Dit is ’n volwaardige amptelike wedstryd,” het Ackermann gesê.
- Kry al jou rugbynuus in Die Papier, op NovaNews en op KickOff.com.