Die Greatest Rivalry-toer het vanaand skouspelagtig by ’n stampvol DHL-stadion afgeskop. ’n Indrukwekkende lig- en droneskou, waartydens vlae deur die lug gevlieg het, het die toon aangegee. Die spelers het deur ’n tonnel van vonkelvure die veld betree, terwyl duisende ondersteuners – waaronder talle All Blacks-aanhangers – vir ’n elektriese atmosfeer gesorg het.
Craig Lucas, die Suid-Afrikaanse sanger en wenner van The Voice South Africa in 2017, het die Nieu-Seelandse volkslied gesing. Dr. Darren Green het die Suid-Afrikaanse volkslied, Nkosi Sikelel’ iAfrika, gelei, met die skare wat luidkeels saamgesing het. Soos tradisie vereis, het die All Blacks ook hul ikoniese haka voor die afskop uitgevoer.
Reeds binne die eerste drie minute moes Imad Khan met ’n besering die veld verlaat en is hy deur Dewaldt Duvenhage vervang. Duvenhage is ’n Stormers-skrumskakel en voormalige Junior Springbok.
Die All Blacks het eerste bloed geruik toe die plaasvervangerhaker Samisoni Taukei’aho in die sesde minuut oor die doellyn is. Beauden Barrett het die doelskop oorgeklits om sy span met 7-0 voor te sit.
Minute later het die besoekers weer oor die Stormers se doellyn gegaan, maar die drie is ná ’n TMO-hersiening afgekeur.
Die Stormers het in die 12de minuut sterk teruggeslaan en die All Blacks onder geweldige druk geplaas. Hul eerste aanval is egter verydel toe ’n aanslaan (‘knock-on’) enkele meter van die doellyn plaasgevind het.
Kort daarna is Anton Lienert-Brown met ’n geelkaart afgestuur weens ’n hoë duikslag. Die Stormers het die strafskop na die kantlyn geskop en Andre-Hugo Venter het oorgegaan vir wat na hul eerste drie gelyk het. Yaqeen Ahmed het die doelskop oorgeklits, maar die skeidsregter het die TMO geraadpleeg oor moontlike obstruksie in die opboufase. Die drie is uiteindelik afgekeur.
Simon Parker is kort daarna ook met ’n geelkaart afgestuur, wat beteken het die All Blacks was reeds ná 14 minute met net 13 spelers op die veld.
Die Stormers het die numeriese voordeel ten volle benut. Ná aanhoudende druk het Deon Fourie uiteindelik oor die doellyn gedruk, en dié keer het die drie gestaan. Ahmed het die doelskop oorgeklits om die telling gelyk te trek. Die telling van 7-7 het lank die weegskaal vertikaal gehou.
Simon Parker het enkele minute voor halftyd in die hoek oorgeduik om die All Blacks se tweede drie van die aand te druk. Beauden Barrett was weer suksesvol met die doelskop.
Die All Blacks het rustyd met 14-7 voorgeloop.