Die bestuurder van die bus waarin 10 Zimbabwiërs tragies op die N1 in die Vrystaat omgekom het, is deur die polisie in hegtenis geneem vir ondervraging oor die omstandighede rondom die noodlottige ongeluk.
Vrystaatse polisiewoordvoerder, sersant Mahlomola Kareli, het die gebeure ná die ongeluk bevestig en gesê die proses vorm deel van die ondersoek na ’n saak van strafbare manslag. Hy het gesê die bestuurder is Vrydag in hegtenis geneem.
Die bestuurder het na bewering beheer oor die bus verloor, waarna dit sowat 24 km buite Trompsburg op pad na Edenburg omgeslaan het. Die ongeluk het Donderdagaand omstreeks 21:30 plaasgevind. Die bus was van Kaapstad na Zimbabwe onderweg en het 66 passasiers vervoer. Die oorledenes sluit vier volwasse vroue, een volwasse man, drie meisies en twee seuns in.
Hul ouderdomme en identiteite is nog nie bekend gemaak nie. Die liggame is na die Vrystaatse staatslykshuis geneem vir nadoodse ondersoeke, hangende identifikasie deur hul families en naasbestaandes.
Die meeste van die oorlewendes is gister ontslaan nadat hulle vir geringe beserings by Pelonomi-hospitaal in Bloemfontein en Alfred Nzula-hospitaal in Trompsburg behandel is. Hulle is met ’n ander bus na Zimbabwe vervoer. Diegene met ernstige beserings en in ’n ernstige toestand bly in die hospitaal vir verdere mediese behandeling.
Die Vrystaatse departement van gesondheid se woordvoerder, Mondli Mvambi, het gesê een van die vier ernstige beseerde pasiënte is aan ’n ventilator gekoppel, terwyl 14 pasiënte vir X-strale verwys is.
Die gru-ongeluk het veroorsaak dat die pad vir etlike ure gesluit is terwyl reddingspanne die wrak van die bus van die toneel verwyder het.