President Cyril Ramaphosa het vandag aangekondig dat Suid-Afrika se munisipale verkiesing op 4 November gehou sal word, wat politieke partye en kiesers minder as 190 dae gee om voor te berei.
Die aankondiging is gemaak tydens die Presidensiële Koördineringsraad-vergadering by die Birchwood Hotel and OR Tambo Conference Centre, waar Ramaphosa met burgemeesters, premiers en regeringsamptenare vergader het.
Die president het die aankondiging gemaak ná gesprekke met die minister van samewerkende regering en tradisionele sake, Velenkosini Hlabisa, wie se departement verantwoordelik is vir die verkiesingsdatums.
Die verkiesing moet binne 90 dae ná die einde van die huidige munisipale rade se vyfjaar-termyn plaasvind. Die vorige munisipale verkiesing is op 1 November 2021 gehou, wat beteken dat die 2026-verkiesing enige tyd tussen 2 November 2026 en 30 Januarie 2027 kon plaasvind.
Die Onafhanklike Verkiesingskommissie het aangedui dat dit gereed is om die verkiesing op die eerste Woensdag van November te hou, met inagneming van faktore soos matriekeksamens, tersiêre eksamens en weerpatrone.
Die aankondiging kom te midde van die regering se voortgesette worsteling met wydverspreide diensleweringsuitdagings in munisipaliteite regoor die land.
Ramaphosa het erken dat “die uitdagings van betroubare dienslewering en die aanspreek van agterstande in basiese dienste duidelik sigbaar is” en het gemeenskapsprotes toegeskryf aan “’n gebrek aan die nodige kapasiteit in die regering om behoorlik te regeer, finansies te bestuur en infrastruktuur te onderhou”.
Die DA het vinnig op die aankondiging gereageer, met die nasionale veldtogbestuurder Ashor Sarupen wat gesê het die party is “gereed vir die optog na verkiesingsdag”.
“Hierdie munisipale verkiesing is deurslaggewend vir baie klein dorpe, munisipaliteite en metro’s, en slegs kiesers kan besluit of hul dorpe of stede slaag of misluk,” het Sarupen in ’n verklaring gesê kort ná Ramaphosa se aankondiging.
Die DA het gesê hy het reeds met meer as 2,5 miljoen kiesers geskakel en beplan om sy veldtog in die komende maande op te skerp om miljoene meer te bereik. Die party mik na munisipaliteite in al die provinsies waar steunvlakke wys dat hy kan wen.
Sarupen het die belangrikheid van kiesersregistrasie beklemtoon en daarop gewys dat stemming slegs by geregistreerde stemlokale moontlik sal wees. Mense sal weer op 20 en 21 Junie 2026 kan registreer om te stem.
Met meer as 200 000 nuwe kiesers wat sedert November 2025 geregistreer het, sal dié verkiesing moontlik groot opskudding in groot metro’s enbaie sleutelmetro’s en munisipaliteite veroorsaak.