Duisende ontheemde Libanese burgers het Vrydag die pad aangepak huis toe. Dít is met die hoop dat ’n skietstilstand van 10 dae met Israel hulle sal toelaat om veilig na die suidelike Beiroet en die land se oorloggeteisterde suide te kan terugkeer.
Minute voordat die skietstilstand om middernag in werking getree het, het ’n reeks Israeliese aanvalle in die suidelike stad Tirus minstens 13 mense doodgemaak en ses woongeboue vernietig, het ’n stadsamptenaar gesê.
Volgens die bepalings van die skietstilstand behou Israel die reg om steeds Hezbollah te teiken om “beplande, dreigende of voortgesette aanvalle” te voorkom, en sê dit sal ’n 10 km-sekuriteitsone langs die grens in suidelike Libanon handhaaf.
LEES | Israel dismisses calls to extend US-Iran ceasefire to Lebanon
Volgens besonderhede van die ooreenkoms, wat deur die Amerikaanse departement van buitelandse sake bekend gemaak is, sal Libanon “met internasionale steun . . . betekenisvolle stappe neem om te verhoed dat Hezbollah” enige aanvalle of vyandige optrede teen Israeliese teikens uitvoer.
Die Hezbollah, wat deur Iran gesteun word, het intussen gesê sy vinger bly “op die sneller” in die geval van enige oortredings.
Ten spyte van waarskuwings om nie na die suide terug te keer nie, het lang rye ontheemde gesinne Vrydag begin oor die bom-beskadigde Qasmiyeh-brug naby Tirus beweeg nadat stootskrapers die oorgang herstel het sodat hulle huis toe kon gaan, volgens AFP-joernaliste.
Vir sommige was die kort skietstilstand tussen Israel en die Libanese regering, bemiddel onder druk van die Amerikaanse president Donald Trump, ’n nuwe bron van hoop.
“Ons gevoelens is onbeskryflik, gelaai met trots en oorwinning,” het Amani Atrash (37) uit haar motor aan AFP gesê, en bygevoeg sy hoop die skietstilstand sal verleng word.
LEES | US Democrats file impeachment articles against Pentagon chief
Oor die grens in Israel het die weermag nog nie beperkings op burgerlike bewegings in kwesbare grensgebiede opgehef nie.
Tog begin sommige burgers daar hoop op ’n terugkeer na ’n meer normale lewe.
“Ek het ’n driejarige dogtertjie en ’n twee maande oue baba, en die hele tyd het ons net nie die huis verlaat nie omdat jy nooit weet wanneer daar ’n vuurpyl-aanval gaan wees nie,” het Ofir Ben-Ari (31) aan AFP gesê.
“Dit was mal, maar ek dink dinge gaan nou rustiger wees en ek sal my dogter park toe kan neem,” het sy bygevoeg.