Privaatondersoeker Mike Bolhuis het bevestig dat die voormalige TV-glanspersoonlikheid Mel Viljoen haar “volle en onvoorwaardelike samewerking” belowe het met ondersoeke na bewerings van bedrog, rampokkery en diefstal waarby sy en haar man, die voormalige prokureur Peet Viljoen, betrek word.
Bolhuis, die hoofspesialisondersoeker van Specialised Security Services (SSS), het gesê Mel het SSS laat verlede maand gekontak om haar samewerking aan te bied en berou oor haar vorige optrede uit te spreek. Sy het Bolhuis op 26 Junie by die SSS-kantore ontmoet en haar onderneming op 28 Junie skriftelik bevestig.
“Ons verwelkom en aanvaar mev. Viljoen se aanbod van volle, onvoorwaardelike samewerking,” het Bolhuis gesê. “Dit is ’n konstruktiewe eerste stap om die aangeleenthede waarby die egpaar betrokke is, op te los. SSS sal saam met die toepaslike owerhede werk om haar volledige en deursigtige samewerking te benut om uitstaande ondersoeke af te handel.”
Bolhuis het gesê Mel het ook namens haar man om verskoning gevra. Hoewel hy glo mondelings met die standpunt saamstem, het hy nog nie sy samewerking skriftelik bevestig nie. SSS ondersoek bewerings van wanvoorstelling, bedrog, diefstal en rampokkery, asook haatspraak en verwante ernstige ekonomiese en kubermisdade.
Die samewerking dui op ’n dramatiese verandering in Mel se houding. So onlangs as 27 Mei het sy na bewering nog openbare en persoonlike aanvalle op Bolhuis geloods.
Die privaatondersoeker het ook klaers en slagoffers versoek om na vore te tree, strafsake by hul naaste polisiekantoor aanhangig te maak en alle bewyse, insluitend kontrakte, bankstate, boodskappe en beëdigde verklarings, aan SSS te voorsien. Hy het verseker dat alle inligting vertroulik hanteer sal word.