Fadiel Adams, leier van die National Coloured Congress, is gearresteer nadat die Suid-Afrikaanse Polisiediens ’n lasbrief vir sy arrestasie uitgereik het.
Dit volg als in verband met bewerings dat hy die ondersoek na die moord in 2017 op die ANC-jeugliga-leier Sindiso Magaqa belemmer het.
Die taakspan vir politieke moorde is in besit van ’n J50-lasbrief vir Adams, wat teregstaan op aanklagte van bedrog en die dwarsboming of belemmering van die regsproses.
“Ek is nie bang nie. As hulle dink hulle kan my intimideer, gaan julle baie harder moet probeer, meneer,” het Adams vroeër voor sy arrestasie gesê.
Vanuit die vangwa het hy egter gesê: “Ouens, ek staan op die punt om aangerand te word, ek gaan waarskynlik ge-waterboard word, dis hoe dit werk. Ek sê vir julle wat gaan gebeur. Hulle kan hul ergste doen.”
SAPD-woordvoerder brig. Athlenda Mathe het gesê die lasbrief hou verband met ernstige bewerings dat Adams die ondersoek op ’n sensitiewe en gevorderde stadium beïnvloed het.
Volgens die ondersoek het die taakspan bevind dat Adams glo ingegryp het in die saak van die beskuldigde én veroordeelde huurmoordenaar.
LEES | Three given life sentences for trafficking of orphaned children
Sibusiso Ncengwa, die huurmoordenaar wat Magaqa vermoor het, is in Julie 2025 tot 25 jaar tronkstraf gevonnis nadat hy skuldig gepleit het op 11 aanklagte, insluitend sameswering tot moord, moord, drie aanklagte van poging tot moord en vuurwapenverwante misdrywe.
Hy het ook voormalige Umzimkhulu-munisipale amptenare by die moord betrek.
Magaqa, wat as ANC-jeugliga sekretaris-generaal gedien het en ook ’n raadslid vir die Umzimkhulu plaaslike munisipaliteit was, is in Julie 2017 saam met raadslede Jabu Mzizi en Nonsikelelo Mafa buite ’n algemene handelaar in Umzimkhulu geskiet.
Hy is in September 2017 aan sy beserings oorlede. Die motief is gekoppel aan politieke geskille oor ’n multimiljoen rand tender vir die opgradering van ’n gemeenskapsaal.